БМТ: Россияда украиналик асирларнинг 95 фоизи қийноққа солинган

Деярли барча украиналик ҳарбий асирлар - 95 фоизи - Россияда қийноққа солинмоқда, деди БМТнинг Киевдаги Инсон ҳуқуқлари мониторинги миссияси раҳбари Даниэл Белл NOS нидерланд телеканалига берган интервюсида.

«Уларни металл таёқ ва дубинкалар билан калтаклашади, электр токи билан қийноққа солишади. БМТ номидан асирлар билан мулоқот қилишда 20 йил давомида кўрган энг ёмон нарсам. Қийноқлар кенг тарқалган ва тизимли», - дейди Белл. У украиналик аскарларни қийноққа солиш биринчи сўроқдан бошланишини таъкидлади.

БМТ вакилининг айтишича, у украиналик маҳбуслар билан суҳбатлар натижалари асосида шундай хулосага келган. 

Россия ва Украинадаги асирлар

Россия президенти Владимир Путиннинг сўзларига кўра, июн ойи бошида Россияда қарийб олти ярим минг украиналик асир бўлган, 1400 га яқин россиялик эса Украинада асирликда. Путин маълумот манбасини айтмади. Уруш шароитида маълумотларнинг тўғрилигини мустақил равишда тасдиқлаш мумкин эмас.

Ўз навбатида, Украина март ойи бошида Украина асирлигида икки минг рус бўлганини даъво қилмоқда. Киев, шунингдек, Москвани украиналик ҳарбийларни қатл этишда айблайди. Украина Бош прокуратурасига кўра, уруш бошланганидан бери таслим бўлган 110 дан ортиқ украиналик қатл этилган. Россия ҳарбий асирларга нисбатан шафқатсизлик айбловларини рад этади.

Женева конвенциялари уришаётган томонларни асирларнинг нормал шароитда сақлаш, уларга нисбатан шафқатсиз муносабатда бўлишни тақиқлаш, асирлар қариндошлари билан алоқа қилишини таъминлаш ва уларга халқаро гуманитар ташкилотларга мурожаат қилиш имкониятини беришга мажбур қилади.