Фронтда футбол кўраётган жангчилар ва Полтава ўққа тутилиши оқибатлари. Уруш суратлари

Украина миллий жамоанинг Евро-2024’даги илк ўйинини томоша қилди

Германияда футбол бўйича Европа чемпионати ўтказилмоқда ва уруш бўлаётганига қарамай, унга Украина миллий жамоаси ҳам йўлланма олган. Россия босқини туфайли жамоанинг саралаш босқичидаги барча уй учрашувлари Полша ва Германияда ўтказилганди. Турнирдаги илк ўйин олдидан (бу ўйин эса Украина миллий жамоаси учун омадсиз кечди) Украина футбол ассоциацияси «бугунги кунда Украинани ҳимоя қилаётган барча мухлислар»га миннатдорчилик билдирди. «Бир миллион мухлис жанг майдонида экани туфайли бир жамоа майдонда», — дея қайд этган миллий футбол ассоциацияси ва шундай қўшимча қилган: «Биз бугун сиз туфайли ўйнай оляпмиз!» Украинлар миллий жамоасининг Евро-2024’даги илк ўйинини Киевдаги барларда ҳам, Донецк областидаги фронт чизиғида жойлашган бошпаналарда ҳам кузатди.

Полтава области ўққа тутилиши оқибатлари

Россия қўшини 17 июн куни Полтава бўйлаб ракета зарбаси йўллади. Регион раҳбари Филип Пронин берган сўнгги маълумотларга кўра, 22 киши, жумладан уч нафар бола тиббий ёрдамга эҳтиёж сезган. Тўққиз киши, улардан икки нафари болалар, шифохонага ётқизилган. Ҳудуддаги 19 бино, жумладан тўққизта кўп қаватли уй шикастланган. «Россия армияси қўлидан мутлақо барча жабрланмоқда. Болалар, катта ёшлилар, жониворлар. Еримиздаги бор тириклик», — дея ёзган Пронин ўз телеграм-каналида.

Донецк атрофидаги украин ҳарбийлари

Донецк области — бу урушдаги асосий жанглар бўлиб ўтаётган ҳудуддир. Фронт чизиғидаги украиналик ҳарбийларда вақтинча бошпаналарда ўтказиладиган қисқа муддатли нафас ростлаш онлари бўлади. Қуйида келтириладиган тасвирлар Украина қуролли кучларининг Донецк областида жанг қилаётган бўлинмаларидан бирининг позициясида олинган.

Часив Яр яқинидаги барқарорлаштириш пункти

Часив Яр атрофида ҳам, Россия қўшини эгаллаб олишга ҳаракат қилаётган бошқа шаҳарлар атрофида ҳам яраланган украин жангчиларига ҳарбий шифокорлар ёрдам кўрсатишмоқда. Қуйидаги фотоларда Донецк областидаги барқарорлаштириш пунктидаги иш фаолияти тасвирланган.

Украина шарқидаги украин жангчилари

Россия босқинини қайтаришда иштирок этаётган украин бўлинмалари қаторида 33-алоҳида механизациялашган бригада ҳам бор. Бўлинма Украинага ҳарбий ёрдам доирасида ғарблик иттифоқчилар томонидан етказиб берилган Leopard 2A4 танклари билан қуролланган.