Ҳайит намозини адо этишга рухсат этилмаган мамлакатларда мусулмонлар қандай ибодат қилади?

Хўш, ҳайит намози ўқишга рухсат берилмаган экан, мўмин Рамазон ойи якунида Роббига шукроналикни адо қилиш учун қандай ибодат қилиши мумкин?

Kun.uz хориждаги кўплаб ватандошларимизни қизиқтираётган ушбу саволга Ўзбекистон Мусулмонлари идораси Фатво бўлими мудири ўринбосари Саиджамол Масаитовдан жавоб олди.

«Ҳанафий мазҳабига биноан, ҳайит намозларини адо этиш вожиб амал ҳисобланади. Бироқ, Ислом шариатида инсон саломатлигини ҳимоя қилиш биринчи ўринда туради. Шу боис, мабодо, маълум бир ҳудуддаги мусулмон уламолари томонидан пандемия сингари айрим сабабларга биноан Ҳайит намози адо этилмаслигига фатво берилган бўлса, Ҳанафий мазҳабида Зуҳо (чошгоҳ) намозини адо этишлик тавсия қилинади.

Зуҳо намозининг вақти Рамазон ҳайитининг биринчи куни қуёш чиққанидан 15 дақиқа ўтгач киради ва қуёш тиккага келишидан 15-20 дақиқа қолгунча давом этади.

Зуҳо намози ҳам бошқа нафл намозлар сингари адо этилади. Унинг энг ками 2 ракат ўқилади, кўпи намозхоннинг ҳимматига боғлиқ бўлади», – деди Саиджамол Масаитов.

Эслатиб ўтамиз, ўтган 2020 йилдаги қатъий карантин чекловлари вақтида Ўзбекистонда жамоат бўлиб Рамазон ҳайити намозини ўқиш имкони бўлмаган, бунинг ўрнига мусулмонлар ўз хонадонларида Зуҳо намозини ўқишган эди.