Де Йонг: «Месси – барча замонларнинг энг буюк футболчиси»

«Аякс» яримҳимоячиси Френки де Йонг «Барселона»даги бўлажак жамоадоши Лионель Месси ҳақида ўз фикрини айтди. Унинг сўзлари каталонияликлар клуби расмий сайтида келтирилган.

«У билан бирга ўйнаш имкониятига эга бўлаётганимдан завқланиб кетяпман ва буни сабрсизлик билан кутмоқдаман. Мен уни барча замонларнинг энг буюк футболчиси деб ҳисоблайман.

Уни таърифлаб бериш қийин. Менимча, у – энг мукаммал футболчи.

У тўп билан ҳам, тўпсиз ҳам ҳамма нарсани уддалай олади. Кўп вазиятлар яратади, чап оёғи билан ўйнашига гап бўлиши мумкин эмас. У жуда ақлли, шунчаки, бошқа даражадаги ўйинчи», – деди де Йонг

Эслатиб ўтамиз, «Барса» 21 ёшли хавбек учун 75 млн евро тўлайдиган бўлган, яна 11 млн евро бонус сифатида берилиши мумкин. У ёзда Каталония клубига қўшилади. Аввалроқ у янги жамоасида ҳам ҳозирги 21-рақамида ўйнамоқчи эканини айтганди.