Isroil G‘azoga elektr energiyasi yetkazib berishni to‘xtatdi

Gumanitar yordam yetkazib berish to‘xtatilganidan so‘ng Isroil G‘azo sektoriga elektr energiyasi yetkazib berishni ham to‘xtatdi. «Biz barcha garovga olinganlarni qaytarish va Hamasning G‘azo sektorida (urush tugaganidan keyin) yo‘qligini ta’minlash uchun barcha imkoniyatlardan foydalanamiz», — dedi Isroil energetika vaziri Eli Koen 9 mart, yakshanba kuni.

Harakat vakili, o‘z navbatida, Isroil hukumatini o‘t ochishni to‘xtatishning ikkinchi bosqichi bo‘yicha muzokaralar fonida «arzon va qabul qilib bo‘lmaydigan shantaj taktikasi»da aybladi.

G‘azoda 58 nafar isroillik garovda qolmoqda

Hamas va Isroil o‘rtasida xalqaro vositachilar ko‘magida tuzilgan kelishuvning 1 mart kuni yakuniga yetgan birinchi bosqichida hamaschilar 33 nafar garovga olinganlarni Isroilga topshirgan, ulardan sakkiz nafari halok bo‘lgan. Buning evaziga Isroil qamoqxonalaridan 1800 ga yaqin falastinlik mahbuslar ozod qilindi.

Isroil ikkinchi bosqichda «G‘azo sektorini to‘liq qurolsizlantirish» va garovga olingan qolgan 58 kishini topshirishni shart sifatida qo‘ydi, ulardan 34 nafari Isroil Mudofaa kuchlari (TSAHAL) tomonidan halok bo‘lgan deb e’lon qilindi.

O‘z navbatida, Hamas Isroil G‘azo sektoridan to‘liq chiqib ketishini, qirg‘oqbo‘yi «blokadasi» to‘xtatilishini, uni qayta tiklashni va moliyaviy qo‘llab-quvvatlashni talab qilmoqda, dedi harakat vakili AFP axborot agentligiga.