Andijonda 4 ta mashina ishtirokida YTH sodir bo‘ldi

Dastlabki ma’lumotlarga ko‘ra, yo‘l-transport hodisasi avtomobillardan biri katta tezlikda harakatlangani va oraliq masofani saqlamagani natijasida kelib chiqqan.

Foto: Andijon viloyati YHXB

Andijon viloyati YHXB Andijon tumanida to‘rtta transport vositasi ishtirokida sodir bo‘lgan yo‘l-transport hodisasi yuzasidan ma’lumot berdi.

Qayd etilishicha, 21 fevral kuni soat 22:10 larda Andijon tumani Mingo‘rik MFY hududida Asaka—Andijon yo‘nalishi bo‘ylab katta tezlikda ketayotgan Nexia-3 o‘zi bilan bir yo‘nalishda harakatlanib, ortga qayrilib olmoqchi bo‘lgan boshqa bir Nexia-3 mashinasiga urilgan. YTH oraliq masofa saqlanmagani sabab kelib chiqqan.

Natijada, birinchi transport vositasi rul boshqaruvini yo‘qotib, qarama-qarshi tomondan harakatlanib kelayotgan Labo hamda SWM G01 rusumli avtomashinalar bilan ham to‘qnashuv sodir etgan.

«Hodisa oqibatida tan jarohati olib, shahar shifoxonasiga murojaat qilgan shaxslar bor», — deyiladi xabarda.

Holat yuzasidan hozirda Andijon tumani IIB YHXG mas’ul xodimlari tomonidan surishtiruv ishlari olib borilmoqda.

#Andijon #YTH