Eron Livanning iltimosi sabab Bayrutga barcha aviareyslarini to‘xtatdi

Livan Tehrondan xavfsizlik nuqtai nazaridan Eron aviakompaniyalarining Bayrutga reyslarini to‘xtatishni so‘radi, deb xabar beradi Tehran Times.

«Eron va Livan aviaregulyatorlari o‘rtasidagi yozishmalarda livanliklarning xavfsizlik nuqtai nazaridan 18 fevralga qadar Bayrutga aviareyslarni to‘xtatishni so‘ragan keltirilgan. Shuningdek, mamlakatdagi barcha xalqaro reyslar bekor qilingan», — deydi Eron Fuqarolik aviatsiyasi tashkiloti rahbari Husayn Purfarzaneh.

Uning so‘zlariga ko‘ra, ayni vaqtda Bayrut aeroportidagi vaziyat murakkab va keskin, ammo Eron tomoni uni kuzatib bormoqda hamda 18 fevralgacha barchasi joyiga tushishiga umid qilyapti.

14 fevral kuni «Hizbulloh» faollari Livan hukumatining Eronga tegishli Mahan Air aviakompaniyasi samolyotini qabul qilmaslik to‘g‘risidagi qaroridan keyin Bayrut xalqaro aeroportiga eltuvchi yo‘lni to‘sib qo‘ydi. Shanba kuniga o‘tar kechasi bir guruh namoyishchilar BMT tinchlikparvar kuchlari qo‘mondoni o‘rinbosariga hamrohlik qilayotgan soqchilarga hujum qilib, ularga tegishli mashinalardan birini yoqib yubordi.

15 fevral kuni Livan prezidenti Jozef Aunning talabi bilan kuch tuzilmalari vakillari hujumga aloqador 26 kishini qo‘lga oldi. Armiya namoyishchilar tomonidan to‘sib qo‘yilgan barcha yo‘llarni ochib yubordi. Davlat rahbari vaziyatni beqarorlashtiradigan bu kabi harakatlar takrorlanishiga yo‘l qo‘ymaslikka va’da berdi.