Buxoroda magistral gaz quvurida avariya ro‘y berdi

10 fevral kuni “Buxoro–Ural” magistral gaz quvurining Buxoro viloyatidan o‘tgan qismida avariya ro‘y berib, yong‘in chiqdi.

Viloyat Favqulodda vaziyatlar boshqarmasiga ko‘ra, avariya Gazli magistral gaz quvurlari boshqarmasining diametri 1020 mm bo‘lgan 26 kg bosim ostidagi quvurning yer ostidan o‘tgan 106-kilometrida, soat 11:26 da ro‘y bergan.

Soat 11:30 da murvatlar yopilib, qoldiq gazlar chiqib ketgan.

Yong‘in natijasida jabrlanganlar va tan jarohati olganlar yo‘q. FVBga ko‘ra, avariya ro‘y bergan joyga eng yaqin aholi maskani Romitan tumani Qizilrabot MFY bo‘lib, u 40 km uzoqlikda joylashgan.

Buxoro viloyatiga oid Telegram-kanallarda viloyatdagi metan-shoxobchalar yopilgani haqida yozilmoqda.

Holat bartaraf etilmaguncha, metan-shoxobchalarga vaqtincha cheklovlar kiritilishi Energetika vazirligi xabarida ham aytilgandi, ammo vazirlik axborotining ushbu qismi ko‘p o‘tmay o‘chirib yuborildi.

Birozdan so‘ng, vazirlik aniqlashtiruvchi xabar e’lon qilib, barcha hududlardagi metan-shoxobchalar “hozirgi rejimda ishlashda davom etishi”ni ma’lum qildi.

“Qo‘shimcha o‘rganishlardan so‘ng, respublikamizning barcha hududlaridagi avtomobillarga gaz to‘ldirish kompressor shoxobchalari avvaldan viloyat hokimliklari bilan kelishilgan tartibda, hozirgi rejimda ishlashda davom etishi belgilandi. Ya’ni ularning faoliyati hududlardagi talab hamda gaz quvurlaridagi bosimdan kelib chiqqan holda yo‘lga qo‘yiladi.

Bu masalada biron-bir o‘zgarish bo‘lsa, jamoatchilikka qo‘shimcha ma’lumot beriladi”, – deyiladi Energetika vazirligi axborotida.