Nogironligi bo‘lgan shaxslar ishlari bo‘yicha idoralararo kengash tashkil etildi

Vazirlar Mahkamasining “Nogironligi bo‘lgan shaxslar ishlari bo‘yicha idoralararo kengash faoliyatini tashkil etish to‘g‘risida”gi qarori qabul qilindi.

Hujjat bilan quyidagilar tasdiqlandi:

• Nogironligi bo‘lgan shaxslar ishlari bo‘yicha idoralararo kengash tarkibi;
• Nogironligi bo‘lgan shaxslar ishlari bo‘yicha idoralararo kengash to‘g‘risida nizom.
• Bosh vazirning ijtimoiy rivojlantirish masalalari bo‘yicha o‘rinbosari Idoralararo kengash raisi hisoblanadi. Tibbiy-ijtimoiy xizmatlarni rivojlantirish agentligi - uning ishchi organi.

Nizom Idoralararo kengashning asosiy vazifalari, funksiyalari, huquqlari va javobgarligi, uning faoliyati tartibi, shuningdek uning samaradorligiga doir talablarni belgilaydi.

Quyidagilar Idoralararo kengashning asosiy vazifalari hisoblanadi:

• nogironligi bo‘lgan shaxslarning huquqlarini ta'minlash sohasidagi davlat siyosatini amalga oshiruvchi davlat organlari, mahalliy davlat hokimiyati organlari faoliyatini muvofiqlashtirish;
• nogironligi bo‘lgan shaxslarning sog‘lig‘ini tiklash, ularni reabilitatsiya qilish, ijtimoiy himoya qilish va huquqlarini ta'minlashga doir davlat dasturlarini amalga oshirishda ishtirok etish;
• nogironligi bo‘lgan shaxslarning ta'lim olishi, ularni kasbga tayyorlash, qayta tayyorlash, malakasini oshirish, mehnat qilishi va bandligiga ko‘maklashish;
• nogironligi bo‘lgan shaxslarning jamiyat va davlat hayotida to‘la huquqli tarzda ishtirok etishi uchun qulay shart-sharoitlar yaratishda ishtirok etish.