Японияда тоғларга чиқа оладиган робот-от тақдим этилди

Япониянинг Kawasaki компанияси Osaka-Kansai Expo 2025 кўргазмасида Corleo робот-от концепциясини тақдим этди. Компания уни шахсий ҳаракатчанликнинг келажаги ва ажойиб қобилиятга эга инқилобий йўлтанламас деб атади.

Қурилма водородли двигатель ва манзилни аниқлаб, барқарорликни таъминлайдиган сунъий интеллект (СИ) билан жиҳозланган.

Corleo тўртта робот оёққа эга бўлиб, бунда орқа оёқлар олдинги оёқлардан мустақил равишда юқорига ва пастга ҳаракатлана олади. Ушбу дизайн юриш ва югуришда ҳаракатларни самарали барқарорлаштириш имконини беради. Қурилма чавандознинг оғирлигини силжитиш орқали бошқарилади.

«Бу шунчаки транспорт воситаси эмас, балки ҳар қандай рельефда ҳаракатлана оладиган, ҳатто қорли тоғлардан сакраб ўтадиган тўрт оёқли йўлтанламас», дейилади Kawasaki хабарида.

Компания робот-от имкониятларини намойиш қилувчи видеороликни эълон қилди. Кўринишидан, видео қурилманинг функционаллигини аниқ ифодалаш учун нейротармоқ ёрдамида яратилган.

Тўрт оёқнинг барчаси махсус каучукли «туёқлар» билан жиҳозланган бўлиб, улар нотекисликдан самарали ўтади ва сирпанишга жуда чидамли. Яна бир диққатга сазовор хусусият - водород даражаси, навигация маълумотлари, тортишиш марказининг позицияси ва бошқа муҳим маълумотларни акс эттирувчи асбоблар панели.

Ҳозирча бу компания томонидан тақдим этилган барча маълумотлар. Тезлик ва автономия ҳақидаги маълумотлар ошкор этилмаган. Kawasaki робот-отни 2050 йилгача чиқаришни режа қилмоқда.