Путин губернаторлар маошини кескин оширди

Россия президенти Владимир Путин губернаторларнинг маошлари ва мукофот пулларини ошириш тўғрисидаги фармонни имзолади. Ҳуқуқий ахборотлар расмий порталига жойлаштирилган ҳужжатга кўра, энди уларнинг маоши бош вазир ўринбосариникига тенглаштирилади.

Faridaily нашрининг баҳолашича, ҳозирда бош вазир ўринбосарлари ойига 1,2-1,3 миллион рубл маош олади (уруш бошланганидан кейин Путин ўз фармони билан амалдорларга даромадлари тўғрисидаги декларацияни эълон қилмасликка рухсат берган, шу боис уларнинг аниқ маоши маълум эмас).

Шу билан бирга, нашр манбаларининг маълумотларига кўра, губернаторларнинг маошлари «анча» кам ва 150-200 минг рублни ташкил этади.

«Шундай қилиб, 2026 йилдан бошлаб област раҳбарларининг маоши камида 5-6 баробарга ошади. Юқори мартабали федерал амалдорлардан бирининг тахминича, ўсиш анча сезиларли бўлади — тахминан 10 баравар», — дейилади хабарда.

Расмий маълумотларга кўра, 2024 йилда Россияда ўртача маош 87,9 минг рублни ташкил этган.

Аввалроқ Россияда курерларнинг маоши дипломли мутахассисларникидан ҳам юқори экани аниқланган эди. SuperJob иш қидириш хизмати томонидан ўтказилган «Курер индекси» тадқиқотига кўра, 2025 йил март ойида Москвада курйерлар учун ўртача маош 130 минг рублни ташкил этган бўлса, олий маълумотли мутахассислар учун бу кўрсаткич 105 минг рублни ташкил этган.