Зеленский: Украина ўт очишни тўхтатиш таклифига рози

Украина АҚШнинг 30 кунлик оташкесим ўрнатиш таклифига рози бўлди, энди Вашингтон Россияни ишонтириши керак. Бу ҳақда Украина президенти Володимир Зеленский 11 март, сешанба куни кечки нутқида Киев ва Вашингтон вакиллари ўртасидаги музокаралар натижаларини шарҳлар экан, айтиб ўтди.

Унга кўра, Саудия Арабистонидаги музокараларда Киев учта таклифни илгари сурган: «осмонда сукунат», «денгизда сукунат» ва «асирларни озод қилиш». Бунга жавобан, Зеленский таъкидлаганидек, Америка томони олдинга биринчи қадамни қўйишни таклиф қилди ва 30 кун давомида сувда, ҳавода ва бутун фронт чизиғи бўйлаб тўлиқ ўт очишни тўхтатиш режимини ўрнатишга ҳаракат қилади. «Украина бу таклифни қабул қилмоқда, биз буни ижобий деб ҳисоблаймиз, биз шундай қадам ташлашга тайёрмиз. АҚШ Россияни бунга ишонтириши керак. Яъни, биз розимиз, агар руслар рози бўлса сукунат ҳукм суради», — деди Украина президенти.

АҚШ Украинага ёрдам тақдим этишни тиклади

Қўшма Штатлар Украинага ёрдам беришни давом эттиради. Украина эса АҚШнинг Россия билан 30 кунлик сулҳ тузиш ҳақидаги таклифини қўллаб-қувватлади. Бу ҳақда Саудия Арабистонининг Жидда шаҳрида 11 март, сешанба куни бўлиб ўтган Америка ва Украина делегациялари ўртасидаги музокаралар якунлари бўйича тарқатилган қўшма баёнотда айтилади. Бундан ташқари, Қўшма Штатлар Украина билан разведка маълумотларини алмашишдаги паузани дарҳол бекор қилади.

Украина президенти девони раҳбари Андрей Ермакнинг таъкидлашича, Украина АҚШнинг зудлик билан 30 кунлик ўт очишни тўхтатиш режимини жорий этиш бўйича таклифини қабул қилишга «тайёрлигини» билдирди, у агар Россия томонидан қабул қилинса ва бир вақтнинг ўзида амалга оширилса, томонларнинг ўзаро келишуви билан узайтирилиши мумкин. «АҚШ Россия Федерациясига тинчликка эришишнинг калити Россия томонининг муносабати эканлигини маълум қилади», — деб ёзган Ермак ўзининг Telegram-каналида. Делегациялар шунингдек, Киев ва Москва ўртасидаги ҳарбий асирларни алмашиш ва украиналик болаларни мажбуран қайтариш масаласини ҳам муҳокама қилишган, деди Ермак. Қўшма Штатлар ушбу аниқ таклифларни Россия вакиллари билан муҳокама қилиш мажбуриятини олди, дея қўшимча қилди Украина президенти девони раҳбари.

Украина ва АҚШ ўртасида Саудия Арабистонида бўлиб ўтган музокаралардан сўнг томонлар имкон қадар тезроқ Украина минерал ресурсларини биргаликда ўзлаштириш бўйича келишув тузишга ҳам келишиб олдилар.

Financial Times нашрининг ёзишича, музокараларни иккинчи куни ҳам давом эттириш режалаштирилмаган.