Reuters: АҚШ Россия нефт ва газига нисбатан санкцияларни юмшатиши мумкин

АҚШ президенти Доналд Трамп маъмурияти молия вазирлигига Россия нефт-газ секторига қарши санкцияларни юмшатиш имкониятларини ўрганишни топширди. Бу ҳақда 7 март, жума куни манбаларга таяниб, Reuters агентлиги хабар берди.

Москва ён берса, санкциялар бекор қилиниши мумкин

Агентлик манбаларига кўра, Оқ уй молия вазирлигидан энергетика соҳасида санкцияларни юмшатиш вариантларини ўрганишни сўраган. Бу Трамп ва Россия президенти Владимир Путин ўртасида Украинада тинчлик ўрнатиш бўйича кутилаётган музокаралар олдидан амалга оширилмоқда.

Вашингтон тинчлик келишувига эришилса, санкцияларни тезда бекор қилиш йўлини ишлаб чиқмоқчи, деди Reuters манбалари. Шу билан бирга, улар АҚШ Россиядан қандайдир имтиёзларсиз санкцияларни бекор қилиш ниятида эмаслигини аниқ кўрсатди.

Аввалроқ Reuters АҚШ бир қатор россиялик олигархларга нисбатан санкцияларни бекор қилиш масаласини кўриб чиқаётгани ҳақида ёзган эди. Россиядаги Америка савдо палатаси ҳам санкцияларни қисман олиб ташлаш таклифини илгари сурди.

Трамп янги санкциялар билан таҳдид қилмоқда

12 феврал куни Трамп Саудия Арабистонида Путин билан учрашишини айтди. Reuters қайд этишича, санкцияларни юмшатиш музокараларнинг марказий элементи бўлиши мумкин.

Шу билан бирга, 7 март куни Оқ уй раҳбари Россия Украинага қарши урушни тўхтатишдан бош тортса, янги санкциялар билан таҳдид қилган эди.