Илон Маск Оқ уйда давлат котиби Марко Рубио билан жанжаллашди – ОАВ

6 март куни Оқ уйда АҚШ ҳукумат самарадорлиги департаменти (DOGE) раҳбари Илон Маск ва АҚШ Давлат котиби Марко Рубио ўртасида Вазирлар Маҳкамаси йиғилишида можаро юзага келди. Бу ҳақда The New York Times (NYT) хабар берди.

Газетанинг манбаларига кўра, Маск Рубиога «сўз ҳужумини қилган», жумладан, Давлат департаменти ходимларини қисқартиришга қодир эмаслигини айтган. Унинг фикрича, Рубио «ҳеч кимни ишдан бўшатолмаган».

Бунга жавобан Давлат котиби Маск ёлғон гапираётганини айтган. Унинг таъкидлашича, Давлат департаментининг 1500 нафар ходими товон пули эвазига ишдан кетган.

NYT нашрининг таъкидлашича, Рубио сўнгги бир неча ҳафта ичида Маскдан, жумладан, ҳукуматни қисқартиришга бўлган ёндашувидан дарғазаб эди. Оқ уйдаги учрашувда эса буни баланд овозда айтган.

Таъкидланишича, Рубио ва Маск ўртасидаги можаро давомида Доналд Трамп ҳеч нарса демаган ва шунчаки нима бўлаётганини кузатган. Баҳс чўзилиб кетганидан кейин АҚШ президенти аралашиб, Рубио «ажойиб иш қиляпти» деган.

NYT сўровига жавобан Трампнинг айишича Маск ва Рубио ўртасида «ҳеч қандай келишмовчилик» йўқ.

Politico хабарига кўра, Трамп DOGE фаолиятини муҳокама қилиш учун вазирлар маҳкамаси йиғилишини чақирган. АҚШ президенти йиғилишда Маск фақат кадрлар масалалари бўйича департамент раҳбарларига тавсиялар бериши мумкинлигини ва якуний қарор ҳуқуқи йўқлигини айтган. Нашрнинг қайд этишича, Трамп DOGE раҳбари ваколатларини чеклаш бўйича биринчи муҳим қадамни қўйган. АҚШ президенти ҳукуматда ўз ишини яхши бажарадиган ходимларни сақлаб қолишга ҳаракат қилишини таъкидлаган.