Россия қўшинлари Кривий Ригдаги меҳмонхонага зарба берди: қурбонлар бор

Россия ракетаси Кривий Ригдаги меҳмонхонага келиб тушди. Камида икки киши ҳалок бўлди, яна 29 киши яраланди, дея хабар берди маҳаллий ҳукумат.

Фото: Украина фавқулодда вазиятлар давлат хизмати

5 март, чоршанба куни кечқурун Россия қўшинлари Украинанинг Днипропетровск областидаги Кривий Риг шаҳрига ракета зарбаси берди. Ракета беш қаватли меҳмонхонага келиб тушди, дея хабар бермоқда Украина фавқулодда вазиятлар давлат хизмати. Россия зарбаси натижасида камида икки киши ҳалок бўлди, яна 29 киши яраланди, улардан 20 нафари оғир аҳволда, деди Кривий Риг мудофаа кенгаши раиси Александр Вилкул. Днипропетровск области маъмурияти раҳбари Сергей Лисакнинг сўзларига кўра, жабрланганлар орасида бир бола ҳам бор.

Одамлар вайроналар остида қолиши мумкин, дея хабар берди Украина фавқулодда вазиятлар давлат хизмати.

Зарбадан бироз олдин Украина ҳарбий-ҳаво кучлари Россия Федерацияси томонидан баллистик қуроллар қўлланиши ва «Кривий Ригдаги нишон» таҳдиди ҳақида огоҳлантирган. Шу куни кечқурун Украина ҳарбийлари Днипропетровск, Донецк, Суми, Харкив ва Чернихив областларида Россиянинг учувчисиз учоқлари ва бошқариладиган бомбалари таҳдиди ҳақида хабар беришди.

Кривий Риг Украина президенти Володимир Зеленскийнинг она шаҳри ҳисобланади, дея хабар беради AFP. Тўлиқ миқёсли уруш бошланганидан бери у мунтазам равишда Россиянинг ўққа тутишига дучор бўлди. Бундан 10 кун аввал, 23 февралга ўтар кечаси Россиянинг шаҳарга берган ракета зарбаси оқибатида бир киши ҳалок бўлган, беш киши яраланган эди. Кривий Риг фронт чизиғидан тахминан 70 километр шимоли-ғарбда жойлашган.

#меҳмонхона #Кривий Риг