Татуировка тери саратонига сабаб бўлиши мумкин

Дания ва финландиялик олимлардан иборат халқаро гуруҳ татуировкалар тери саратони ва лимфома хавфини ошириши мумкинлигини аниқлади. Айниқса, йирик татуировкалар янада хавфлироқ экани маълум бўлди. Ушбу тадқиқот натижалари BMC Public Health илмий журналида эълон қилинди.

Татуировка учун сиёҳ терига киритилганда, унинг бир қисми иммунитет тизимининг муҳим таркибий қисмлари ҳисобланган лимфа тугунлари томонидан сўрилади. Организм эса бу заррачаларни ёт моддалар сифатида қабул қилади. Бу иммунитет тизимининг доимий фаоллашуви ва сурункали яллиғланишга олиб келиши мумкин.

“Биз сиёҳнинг лимфа тугунларида тўпланишини кузатяпмиз, бу уларнинг вазифасини сусайтириши ёки соғлиққа бошқа салбий таъсир кўрсатиши мумкин, деб гумон қилмоқдамиз”, — деб изоҳ берди Жанубий Дания университети профессори, гематолог Генрик Фредериксен.

Тадқиқотда олимлар 5900 нафардан ортиқ даниялик эгизаклар тўғрисидаги маълумотларни ўз ичига олган Danish Twin Tattoo Cohort маълумотларидан фойдаланган. Бу умумий генетик ва экологик омилларни инобатга олган ҳолда, бири татуировкали, иккинчиси эса татуировкасиз бўлган эгизакларни таққослаш имкониятини яратди.

Тадқиқот натижалари шуни кўрсатдики, татуировка қилдирган одамларда тери саратони ва лимфома касалликлари кўпроқ учрайди. Айниқса, катта ҳажмдаги (кафт ўлчамидан каттароқ) татуси бор шахсларда хавф даражаси юқори экани аниқланди. Уларда лимфома хавфи эса татуировка қилдирмаган одамларга нисбатан қарийб уч баробар юқори бўлган.

Тадқиқот муайян рангдаги сиёҳлар ва саратон хавфи ўртасида боғлиқликни аниқламаган бўлса-да, аввалги изланишлар айрим пигментлар кўпроқ зарарли бўлиши мумкинлигини кўрсатган. Масалан, қизил сиёҳ бошқаларига нисбатан кўпроқ аллергик реакцияларни келтириб чиқаради.