Тошкентда таксида чақалоқ туғилди

Пойтахтда ҳар куни ҳам учрайвермайдиган туғилиш қайд этилди. Она фарзандини туғуруқхонага олиб кетаётган машинада дунёга келтирди. Такси ҳайдовчиси Kun.uz’га ҳаммаси қандай юз бергани ҳақида гапириб берди.

Фарҳод Фаттоев Бухоро вилоятидан. 14 йиллик тажрибага эга ҳайдовчи. 5 нафар фарзанднинг отаси. У ҳозир таксичилик билан шуғулланади. Аввал Matiz’да таксичилик қилган, кейин эса одамлар унга чиқмай қўявергани ортидан қарзга Gentra машинасини олиб, ишини давом эттиради. Тошкентга келганига ҳам кўп бўлмаган. Яқинда мижозлардан бири унинг машинасида ўғил фарзандни дунёга келтирди.

Унинг айтишича, одатдагидек буюртмалардан бирини олиб манзилга йўл олган. Манзилга етмасидан мижоз қўнғироқ қилиб, тезроқ келишни, ҳомиладор аёлни туғуруқхонага олиб бориш кераклигини айтади. У манзилга тезда етиб боради.

“Аёлнинг дарди машинага чиққанидан 5 дақиқа ўтиб бошланди, ёнида қайноналари ҳам бор эди. Уларни шифохонага етказиш учун йўл ҳаракати қоидаларига қарамасдан тезликни оширдим… Бир пайт орқа ўриндиқдан чақалоқ овози эшитилди, машина ойнасидан қарасам аёлнинг қайнонаси чақалоқни қўлларида ушлаб турган экан. Ҳаяжонланиб қолдим. Хавотирим икки карра ошди, чунки янги туғилган чақалоқни тезроқ шифохонага олиб боришим керак эди”, — дея воқеани ҳикоя қилиб беради Фарҳод Фаттоев.

Орада ЙПХ ходимлари уни тўхтатишга ҳаракат қилган, у эса ойнасини тушириб, ходимларга вазиятни тушунтирган. Шундан сўнг ЙПХ ходимлари уларни Тошкент шаҳар 3-сонли туғуруқхонага етиб олишларига кўмаклашган.

“35 дақиқалик манзилга 20 дақиқада бордик. Она ҳам, бола ҳам соғлом эди. Уларни соғлом етказиб бора олганимдан жуда хурсанд эдим”, — дейди ҳайдовчи.

Маълум бўлишича, аёл ўғил фарзандни дунёга келтирган. Унга яхши ният билан Абдуллоҳ дея исм қўйишган. 

“Онахон неварасига Абдуллоҳ деб исм қўйишганини айтиб, мени кўпдан кўп дуо қилди”, — дея хурсандчилигини яширмайди Фарҳод Фаттоев.

Ҳайдовчининг айтишича, бу воқеадан хабар топган яқинлари энди уни ҳазиллашиб “тез ёрдам” деб аташга ўтишган.