Ўзбекистон январда газ экспортини 9 фоизга оширди

2025 йилнинг январ ойида 21,8 млн долларлик газ экспорт қилинди, бу – ўтган йилнинг мос даврига нисбатан 9 фоизга кўп. Бундан 5 йил олдин, 2025 йилдан бошлаб газ экспорти тўхтатилиши режа қилинаётгани айтилганди.

Ўзбекистон 2025 йилнинг илк ойида 21,8 млн долларлик табиий газ экспорт қилди. Бу – ўтган йил январига нисбатан 9 фоизга кўп. Бу ҳақда Статистика агентлигига ҳисоботида келтириб ўтилган.

Шунингдек, январда нефт, нефт маҳсулотлари ва шунга ўхшаш материаллар экспорти ўтган йилга нисбатан 48,2 фоизга ўсиб, 30,2 млн долларни ташкил қилди. Бундан ташқари, ўтган ойда 17,2 млн долларлик электр токи ҳам экспорт қилинди.

Расмий статистикага қараганда, Ўзбекистон ички бозордаги талаб қондирилмаётган шароитда табиий газ экспортини давом эттираётгани эътиборли.

Пандемия билан ўтган 2020 йилда 478 млн долларлик газ экспорти амалга оширилган бўлса, 2021 йилда 717 млн долларлик, 2022 йилда 911 млн долларлик газ сотилган. Ўзбекистон илк марта табиий газнинг нетто импортёрига айланган 2023 йилда 530 млн долларлик газ экспорти амалга оширилган. 2024 йилда бу рақам 628 млн долларгача ошган.

Бундан 5 йил олдин, 2020 йил январида Ўзбекистон Либерал-демократик партияси сиёсий кенгаши йиғилишида нутқ сўзлаган бош вазир Абдулла Арипов 2025 йилгача Ўзбекистон табиий газ экспортини тўхтатишни режалаштираётганини айтганди.

“2025 йилгача Ўзбекистон табиий газ экспортини тўхтатиш, уни ўзимизда тўлиқ қайта ишлаш ишлаш, шунингдек қўшилган қийматли маҳсулотлар ишлаб чиқаришни кенгайтириш чораларини кўради”, деганди ҳукумат раҳбари.

Kun.uz ҳукуматнинг 2025 йилдан бошлаб газ экспортини тўхтатишга оид режаси ҳали ҳам ўз кучидами деган савол билан бош вазир ва Энергетика вазирлиги матбуот хизматларига сўров юборди, аммо бир неча кундирки жавоб бўлмади.

#газ #энергетика