Шимолий Корея Россияга қўшимча қўшин юборди

КХДР ҳукумати Украинага қарши жанговар ҳаракатларга иштирок этиши учун Россияга қўшимча қўшин юборди, деб ёзмоқда Reuters.

РФга юборилган КХДР ҳарбийлари Курск областидаги жангларга қатнашиши кутилмоқда. Агентлик Россияга юборилган Шимолий Корея ҳарбийларининг сонига аниқлик киритмаган. Жанубий Кореянинг The JoongAng нашрига кўра, КХДРдан Россияга 1000 нафардан 3000 нафаргача ҳарбий келган.

Жанубий Корея разведкаси агентлик сўровига расман изоҳ бермаган.

Аввалроқ The New York Times АҚШ Мудофаа вазирлигидаги юқори мартабали вакилларга таяниб, Шимолий Корея Россияга қўшимча куч юборишни режалаштираётгани ҳақида ёзганди.

Россияга ўтган йилнинг октябрида 10-12 минг Шимолий Корея ҳарбийлари келган бўлиб, улар Курск области жангларида иштирок этган. Украина томони версиясига кўра, КХДР қўшинлари катта йўқотишларга учраган (4 минг киши ўлдирилган ва яраланган). Январ бошларида Шимолий Корея қўшинлари жанглар зонасидан олиб кетилган, аммо феврал ўрталарида КХДР ҳарбийлари яна Курск областида пайдо бўлганди.