Зеленский Киевда АҚШ президентининг махсус вакили Кит Келлог билан учрашди

Учрашув якуни бўйича матбуот анжумани ўтказилиши керак эди, аммо Америка томонининг илтимосига кўра, у бекор қилинди. Зеленский ижтимоий тармоқлардаги саҳифасига суҳбат «яхши» ўтганини ёзиб қолдирди.

Фото: Getty images

Украина президенти Володимир Зеленский Киевда АҚШ президентининг махсус вакили Кит Келлог билан учрашди, деб хабар беради «Украинская Правда».

Аввалига Зеленский ва Келлог учрашувидан кейин матбуот анжумани ўтказилиши режалаштирилган эди, аммо у ташкил этилмади.

«Америка томонининг илтимосига кўра, учрашув формати протокол учун суратга олишни ўз ичига олади, баёнотлар ёки саволлар кўзда тутилмаган», — дейди Зеленскийнинг матбуот котиби Сергей Никифоров.

Зеленский ижтимоий тармоқлардаги саҳифасига суҳбат «яхши» ўтганини ёзиб, АҚШга украин халқини қўллаб-қувватлагани, шунингдек, Келлогнинг ўзига «муҳим натижаларга эришишда ҳамкорликдаги ишлар» учун миннатдорчилик билдирди.

«Жанг майдонидаги вазиятни ва барча асирларимизни қандай қилиб қайтаришни, шунингдек, амалий натижа берадиган хавфсизлик кафолатларини муҳокама қилдик», — дейди Украина президенти.

Келлог Киевга 19 февралда, Ар-Риёдда ўтказилган АҚШ ва Россия музокараларининг эртаси куни учиб келганди. У Украинага «тинглаш» учун келганини ва АҚШ «керак бўлган нарсани беришга тайёрлигини» маълум қилган.

Зеленскийга қадар Келлог Киевда Украина ТИВ раҳбари Андрей Сибига билан учрашув ўтказган. Вазирнинг айтишича, суҳбат «кенг қамровли, адолатли ва мустаҳкам тинчликка эришиш йўллари» ҳақида бўлган.

#Киев #Кит Келлог