БМТ: Зеленский тегишли сайловлардан сўнг ўз лавозимини эгаллаб келяпти

Трампнинг Украина президентини «диктатор» деган даъвоси Бирлашган Миллатлар Ташкилотида кескин танқидларга сабаб бўлди. Германия канцлери Америка етакчисининг сўзларини нотўғри ва хавфли деб атади.

Фото: Украина президенти офиси

Бирлашган Миллатлар Ташкилоти Украина президенти Володимир Зеленскийни ноқонуний давлат раҳбари деб ҳисобламайди, деди 19 феврал, чоршанба куни БМТ бош котиби Антониу Гутерришнинг матбуот котиби Стефан Дюжаррик. «Президент Зеленский тўғри ўтказилган сайловдан сўнг ўз лавозимига киришган», деди у Ню-Йоркда журналистларга АҚШ президенти Доналд Трампнинг Зеленскийни «диктатор» деб атаган сўзларини изоҳлар экан.

Ўша куни аввалроқ Трамп ўзининг Truth Social ижтимоий тармоғида украиналик ҳамкасбини сўровларда «жуда паст рейтинг»га эга бўлишига қарамай, «президентлик сайловларини ўтказишдан бош тортгани» учун танқид қилган эди. У Зеленскийни Америка пулларини «ютиб бўлмайдиган ва ҳеч қачон бошланмаслиги керак бўлган уруш» учун сарфлаганликда айблади. «Сайловсиз диктатор, Зеленский шошилса яхши бўлади, акс ҳолда унинг мамлакати қолмайди», деб ёзган Америка етакчиси.

Украина президенти Трампнинг сўзларига ҳозирча изоҳ бермади. Украина ташқи ишлар вазири Андрей Сибига мамлакат ўз яшаш ҳуқуқини ҳимоя қилишини таъкидлади. «Украина замонавий Европа тарихидаги энг даҳшатли ҳарбий ҳужумни ва уч йиллик умумий урушни бошдан кечирди. Украина халқи ва унинг президенти Володимир Зеленский Путин босимига кўнишдан бош тортди. Ҳеч ким Украинани таслим бўлишга мажбурлай олмайди. Биз мавжуд бўлиш ҳуқуқимизни ҳимоя қиламиз», деб ёзди у ижтимоий тармоқда.

Шолц ва Бербок Зеленскийни ҳимоя қилиб чиқди

Германия ҳукумати ҳам Доналд Трампнинг баёнотларини танқид қилди. Германия канцлери Олаф Шолц Der Spiegel нашрига берган интервюсида Украина президентининг демократик қонунийлигини инкор этиш «шунчаки нотўғри ва хавфли» эканини айтди. «Володимир Зеленский Украинанинг сайланган давлат раҳбари эканлиги тўғри. Уруш пайтида тўғри сайловлар ўтказишнинг иложи йўқлиги Украина конституцияси ва сайлов қонунчилигида ўз аксини топган. Ҳеч ким бошқача даъво қилмаслиги керак», деб таъкидлади Шолц.

Украина ташқи ишлар вазири Анналена Бербок Трампнинг баёнотларини «бутунлай абсурд» деб баҳолади. «Агар сиз реал дунёга назар ташласангиз ва шунчаки твит жойлаштирмасангиз, Европада ким диктатура остида яшаётганини тушунасиз: Россиядагилар, Беларусдагилар», — деди Бербок ZDF телеканалида.

#БМТ #Володимир Зеленский