«Ҳаммасини тузатиш вақти келди» – Зеленский Оқ уйдаги жанжалдан афсусда эканини айтди

Украина президенти Володимир Зеленский 28 феврал куни Оқ уйда содир бўлган тортишувдан афсусланишини айтиб, пост ёзди. Бу амалда Украина президентининг Трампдан узр сўраши деб қабул қилинди. Трамп конгрессдаги чиқишида Зеленскийнинг баёнотидан хурсанд бўлганини айтди. Киев ва Вашингтон шу ҳафта минерал ресурслар бўйича келишувни имзолайди.

Узр сўрамади, лекин пушаймонлик билдирди

АҚШда Зеленский Трамп билан муносабатларни тиклаш учун оммавий кечирим сўраши кераклиги айтилаётганди. Украина президенти тўғридан тўғри кечирим сўрамади, лекин Трампнинг иш кабинетидаги ўша воқеадан афсусда эканини айтди.

«Аввало Украина тинчликка интилаётганини таъкидламоқчиман. Ҳеч биримиз охири йўқ урушни истамаймиз. Украина тинчликни яқинлаштириш учун имкон қадар тезроқ музокара столига ўтиришга тайёр. Мен ва жамоам Трампнинг кучли бошқаруви остида мустаҳкам тинчликка эришишга тайёрмиз.

Урушни тугатиш учун тезда ишга киришишга шаймиз. Асирларни озод қилиш, осмонда тинчликка эришиш, олис масофага учадиган ракеталарни тақиқлаш, энергетика ва бошқа фуқаролик объектларига зарбаларни тўхтатиш, денгизда тинчликка эришиш бу борада биринчи қадам бўлиши мумкин. Агар Россия ҳам шуни истаса, албатта.

Кейинги босқичга ҳам тезда ўтиб АҚШ билан мустаҳкам тинчлик борасида якуний келишувни имзолашни истаймиз. Америка Украинага ўз мустақиллигини сақлаб қолиш учун чиндан катта ёрдам берганини қадрлаймиз. Ва, албатта, президент Трамп бизга Javelin’ларни берганда ҳаммаси ўзгара бошлаганини ҳам унутмаймиз.

Жума куни Оқ уйдаги учрашувимиз кўнгилдагидек ўтмади. Бундай бўлганидан афсусдаман. Ҳаммасини тузатиш вақти келди. Келажакдаги мулоқотлар самарали бўлишидан умидворман.

Украина минерал ресурслар бўйича келишувни исталган вақтда, исталган қулай форматда имзолашга тайёр. Бу келишув хавфсизлик кафолати йўлида ташланган катта қадам бўлади деб ўйлаяпмиз. Умид қиламан, шартнома ўз самарасини беради», деб ёзди Зеленский Twitter саҳифасида.

«Зеленскийдан хат олдим»

АҚШ президенти Доналд Трамп кеча конгрессда чиқиш қилди. Минбарда нутқ сўзларкан Трамп Зеленскийдан хат олгани, Украина келишувга розилигини мамнун бўлиб айтди. Трамп табиийки, хат деб Зеленскийнинг постини назарда тутди.

Reuters Украина ва АҚШ минерал ресурслар бўйича келишувни Трамп конгрессда чиқиш қилишидан аввал имзолаши ҳақида хабар берганди. Афтидан томонлар бунга улгурмаган, лекин ҳафта давомида келишув имзоланиши кутилмоқда. Аммо ҳужжат қаерда, кимлар иштирокида имзоланиши, Зеленский навбатдаги марта АҚШга бориш-бормаслиги аниқ эмас.

Трамп конгрессдаги чиқишида Россиядан улар ҳам тинчликка тайёрлиги ҳақида кучли сигнал олганини айтди. Унинг гапларини республикачилар олқишлар билан қаршилади. Демократлар эса жим туришди, баъзилари залдан чиқиб ҳам кетди.

Ҳал қилувчи қарор

Зеленский Twitter’да юқоридаги постини ёзган бир вақтда унинг Telegram-каналида бошқа мазмундаги видеомурожаат эълон қилинди. Унда Киевдаги кўчада туриб гапирган Зеленский ҳарбийлар ва разведкачиларга АҚШ чиндан Киевга қурол юборишни тўхтатгани ҳақида аниқ маълумот олишни топширганини айтди. Олдинроқ Трамп Украинага қурол-яроғ юборишни тўхтатиб қўйгани айтилган, лекин бу ҳақда расман эълон қилинмаганди.

Афтидан, Киев қурол олишни чиндан тўхтатган ва бу минерал ресурслар бўйича келишувни имзолаш учун ҳал қилувчи босим бўлган. Чунки Америка қуролларисиз, айниқса, ҳаво ҳужумидан мудофаа тизимларисиз Россиядан ҳимояланиш деярли имконсиз масала.

Америка нашрларининг ёзишича, Зеленский кучли Трамп билан шартнома имзолашга тайёр эканини айтганидан кейин ҳам АҚШ президенти Киевга қурол юбориш тақиқини бекор қилмаган. Трамп қурол юборишни Зеленский Россия билан музокарага тайёр эканини билдиргач тикламоқчи.

Ўткир Жалолхонов тайёрлади.
Тасвирчи ва монтаж устаси – Фахриддин Ҳотамов.