Чемпионлар ватанга қайтишди

Бангладешда ўтган ампутантлар ўртасидаги биринчи Осиё чемпионатида ғолиб бўлган Ўзбекистон жамоаси ватанга қайтди.

Ўзбекистон ампутантлар жамоаси Осиё чемпионатининг гуруҳ босқичида Индонезия (8:1), Бангладеш (3:0), Непал (13:0) ва Ироқни 4:1 ҳисобида мағлуб этган бўлса, финалда Индонезия дарвозасига жавобсиз 6 та тўп киритилди.

Матонатли чемпионлар 14 февралга ўтар кечаси Ўзбекистонга қайтиб келишди. Қаҳрамонларни кутиб олиш маросимида Tribuna.uz ҳам иштирок этиб, турнир иштирокчиларининг мусобақа борасидаги фикрлари билан қизиқди.

Абдужамил Шукуров

— Мусобақа дастлаб Ҳиндистонда ўтиши керак эди. Негадир бекор бўлиб қолди. Орада қиш келди, совуқ тушди. Турнирга тайёрланишимиз учун ёпиқ майдон керак эди. Ўзимиз Янгийўлдан майдон топдик. Қолганини Паралимпиядагилар ҳал қилиб беришди. Янги меҳмонхонада яшаб, совуқда 2 маҳал машғулот ўтказдик. Осон бўлмади: совуқдан 30 даража иссиқ мамлакат — Бангладешга бордик, аммо кўникиб кетдик. Тайёргарлик кўнгилдагидек бўлгани учун хотиржам ўйнаб ютиб келдик.

Чемпионатда Ироқ жамоасига қарши баҳс қийинроқ кечди, деб айта оламан. Уларни мағлуб этгач, мураббий ва ўйинчи сифатида кўнглим хотиржам бўлди.

35 йилдан бери футбол ўйнайман. Туркиядаги йиғинда Англия ва бошқа жамоаларга қарши ўртоқлик баҳси ўтказдик. Ўшанда ўйнамай, мураббийлик қилдим ва жуда қийналдим. Ундан кўра ўйнаш осонроқ экан. 5 карра жаҳон чемпиони бўлгандим ва мана Осиё чемпионлигига ҳам эришдим. Энди бемалол мураббийлик қилаверсам бўлади.

Қудрат Худойқулов

— Илк Осиё чемпионатида биринчи ўринни олдик. Финалнинг ва турнирнинг энг яхши футболчиси деб топилдим. 33 та гол урдик, 1 та тўп ўтказиб юбордик. Ғалаба билан бутун ўзбек халқини табриклайман.

Осиёдаги асосий рақибларимиз Эрон ва Ироқ эди. Эронликлар қандайдир бахтсиз ҳодиса сабабли кела олишмади. Турнирдаги энг қизиқарли баҳс Ироққа қарши кечди.

Азиз Абдураҳмонов

— Осиё чемпионати чиройли ўтди. Мусобақага яхши тайёргарлик кўргандик. Насиб қилса, кейинги йили ўтказиладиган жаҳон чемпионатига тайёргарлик кўрамиз.

Улуғбек Тошпўлатов

— Илк Осиё чемпионатининг олтин медалини қўлга киритиш — жуда катта ғурур. Катталар олдин 5 карра жаҳон чемпиони бўлишган. Биз ёш қалдирғочлармиз. Насиб қилса, биз ҳам 5 бор чемпион бўламиз. 

Бекзод Ҳабибуллаев

— Ҳаммаси — меҳнатлар самараси. Биринчи Осиё чемпионатида ғолиб бўлдик. Бу кубок — бутун Ўзбекистонники.