Зеленский ўз офисида уюштирилган суиқасд оқибатларини айтиб берди

Унинг ҳаётига суиқасд уюштириш чоғида президент офисидагилардан бир неча киши ҳалок бўлган.

Фото: The Guardian

Украина президенти Володимир Зеленский The Guardian нашрига берган интервюсида Россия билан урушнинг дастлабки кунларида ўзига уюштирилган бир неча суиқасд ҳолати ҳақида айтиб берди. Унинг сўзларига кўра, ҳужумлардан бири вақтида унинг офиси ходимларидан бир неча киши ҳалок бўлган.

Кўпчилик давлат етакчилари менга қўнғироқ қилиб, кетиш кераклигини айтишди. Буларнинг бари бўлган. Бу кимдир қўнғироқ қилиб, «кет» дейиши, мен «йўқ» деганим эмас. Турли томондан босим бўлганди. [Мени] ўлдиришни истаганлар бор эди, ўқ овозлари ва шунга ўхшаш нарсалар бор эди. Офисимиз ичкарисида ҳам бир неча киши ҳалок бўлганди, [мени] ҳимоя қилганлар бор эди. Десант туширилиши ва бошқа шунга ўхшаш ишлар бўлганди.

Украина президенти фикрича, Россия шу тариқа унга жисмоний босим ўтказган, шу билан бир вақтда ўт очишни тўхтатиш бўйича ултиматумлар қўйиб, ўз шартларини қабул қилишни талаб қилган.

Зеленскийнинг офисидагилар кенг кўламли уруш бошидаёқ президентга ўндан ортиқ суиқасд уюштирилгани ҳақида хабар берганди. Унинг ўзи 2023 йилда ўлдиришга бўлган доимий уринишларни «суғур куни» билан таққослаганди.

Зеленскийнинг ҳаётига сўнгги суиқасд ҳақида 2024 йил майида хабар берилганди. Ўшанда Украинада икки полковник Россия хавфсизлик хизмати (ФХХ) билан ҳамкорликда гумон қилиниб, ҳибсга олинганди. Украина разведка хизматларига кўра, улар Украина президенти Володимир Зеленский, шунингдек, Бош разведка бошқармаси бошлиғи Кирилл Буданов ва Украина Хавфсизлик хизмати раҳбари Васил Малюкни ўлдиришга тайёргарлик кўрган.

#Украина #Россия #Володимир Зеленский