Макрон: Украина инқирози ва Трампнинг сиёсатини Европани бирдамликка ундамоқда

Франция президентининг таъкидлашича, АҚШ президенти Доналд Трампнинг сиёсати, шунингдек, Европанинг бошқа давлатларга қарамлигини камайтиришга ҳам хизмат қиляпти.

Фото: Reuters

Украина инқирози ва АҚШ президенти Доналд Трампнинг янги администрацияси Европа Иттифоқини бирдамликка ҳамда европаликларни коллектик хавфсизлик чақирувларига жавоб тайёрлашга ундамоқда. Бу ҳақда Франция президенти Эммануэл Макрон 3 феврал кунги баёнотида маълум қилди.

Франция етакчисининг сўзларига кўра, Доналд Трамп сиёсияти Европани бошқа давлатларга қарамлигини камайтиришга ҳам хизмат қилмоқда.

«Украинадаги воқеалар, шунингдек, Доналд Трампнинг янги администрацияси томонидан қабул қилинаётган қарорлар европаликларни янада бирдам бўлишга, коллектив хавфсизлик соҳасидаги чақириқларга фаолроқ жавоб қайтаришга ундаяпти», — деди Франция раҳбари ЕИ етакчиларининг норасмий учрашувида.

Макроннинг таъкидлашича, коронавирус эпидемияси ва Россиянинг Украинадаги тажовузи қайта уйғониш нуқтасига айланган. Унинг айтишича, Доналд Трампнинг АҚШ ҳокимияти тепасига келиши Европанинг бошқа давлатларга бўлган қарамлигини камайтириш йўналишини белгилаб берган омиллардан бирига айланган.

Франция етакчисининг қайд этишича, иттифоқ аъзолари «мудофаа саноати ва мудофаа технологик базаларини ривожлантиришни давом эттириши», бундан ташқари, «Европа ишлаб чиқаришига устуворлик берган ҳолда кўпроқ инвестиция киритиши» керак.

Аввалроқ Европа комиссияси АҚШ президенти Доналд Трампни яқинда қабул қилинган тариф қарорлари ортидан юзага келиши мумкин бўлган савдо урушлари оқибатлари ҳақида огоҳлантирганди. Европа Иттифоқи вакилининг таъкидлашича, Европа Иттифоқи ноҳақ ёки ўзбошимчалик билан тарифларни жорий қилган ҳар қандай савдо шеригига «қатъий жавоб беради».

#Франция #Эммануэл Макрон