Шавкат Мирзиёев Доналд Трампни Ўзбекистонга таклиф қилди

Ўзбекистон президенти Шавкат Мирзиёев Америка Қўшма Штатлари президенти Доналд Трампни ушбу лавозимга расмий киришгани муносабати билан табриклади. Бу ҳақда Ўзбекистон презизиденти матбуот котиби Шерзод Асадов хабар қилди.

Шавкат Мирзиёев ўз мактубида Доналд Трампнинг янги муддатдаги фаолияти давомида АҚШнинг халқаро майдондаги нуфузи ва обрў-эътибори, иқтисодий қудрати ва салоҳияти, глобал миқёсдаги ўрни ва аҳамияти янада ортишига ишонч билдирди.

Мактубда Ўзбекистон АҚШнинг мамлакат мустақиллиги, суверенитети ва ҳудудий яхлитлигини доимий қўллаб-қувватлашга қаратилган сиёсатини юқори баҳолайди ва алоҳида қадрлаши қайд этилган.

«Сизнинг биринчи президентлик даврингизда Ўзбекистон-АҚШ ўртасида янги даврдаги стратегик шериклик муносабатлари ўрнатилганини ва кўп қиррали алоқаларимиз юқори босқичга кўтарилганини истар эдим. Биз бундан кейин ҳам икки ва кўп томонлама платформалар доирасида узоқ муддатли ҳамкорлигимизни янада ривожлантиришдан манфаатдормиз», — дейилади Ўзбекистон президенти мактубида.

Шунингдек, Шавкат Мирзиёев Доналд Трампни ташриф билан Ўзбекистонга келишга таклиф этди.

АҚШда 2024 йилги президентлик сайловлари якунлари 6 ноябр куни эълон қилинганди. Унда республикачилар номзоди Доналд Трамп ғолиб бўлди — у амалдаги президент Жо Байден пойгани тарк этганидан кейин Демократик партиядан номзод қилиб кўрсатилган Камала Ҳаррисни мағлуб этди. Трамп иккинчи бор Оқ уйга раҳбарлик қилади — унинг биринчи муддати 2017 йилдан 2021 йилга қадар давом этганди.

20 январ куни Доналд Трамп АҚШнинг 47-президенти лавозимини расман эгаллади.