Байден Трампнинг бир қатор таниқли рақибларини афв этди

20 январ, душанба куни истеъфога чиққан АҚШнинг 46-президенти Жо Байден ўз президентлиги сўнгги бир неча соатларида Доналд Трамп томонидан давлатга хиёнатда айбланган АҚШ штаб бошлиқлари бирлашган қўмитасининг собиқ раиси, истеъфодаги генерал Марк Миллини, Аллергия ва юқумли касалликлар институтининг собиқ раҳбари, COVID-19 пандемиясига қарши кураш бўйича собиқ маслаҳатчи Энтони Фауcи; АҚШ Конгрессининг собиқ аъзоси Лиз Чейни ва Трампни 2021 йил 6 январда тарафдорлари Капитолийга бостириб кирганлиги учун жавобгарликка тортишга ҳаракат қилган Вакиллар палатасининг суд-ҳуқуқ қўмитасидаги юқори даражадаги демократларни афв этиш ҳақидаги фармонларни имзолади. 

«Ушбу афв этиш ҳужжатларини уларнинг бирортаси қонунбузарлик қилганини тан олиш сифатида қабул қилиш ёки бирон бир жиноят учун айбни тан олиш сифатида талқин қилиш керак эмас», дейилади Байденнинг баёнотида. AFP хабар беришича, бу қарор 20 январ куни АҚШнинг 47-президенти лавозимига киришган Трамп томонидан афв этилганлардан эҳтимолий қасос олинишидан ҳимоя қилиш учун қабул қилинган.

AFP'нинг ёзишича, Оқ уйни тарк этишдан олдин Байден «энг синовдан ўтмаган» тарзда афв этиш ҳуқуқидан фойдаланган: у ҳатто тергов остида бўлмаганларни ҳам афв этган. Гап профилактик афв деб аталадиган нарса ҳақида бормоқда — ҳозирда бу шахсларнинг бирортасига нисбатан жиноий иш олиб борилмаяпти ва шунинг учун уни ҳозир очиш мумкин эмас. Қарор «Трамп ва бўлажак президентлар томонидан афв этиш усулларидан янада кенгроқ фойдаланишга» йўл очиши мумкин, дея қайд этади агентлик.

Германия элчиси: Трамп АҚШда конституциявий тузумни ўзгартириши мумкин

Германиянинг Вашингтондаги элчиси Андреас Михаэлис Германия ҳукуматини АҚШнинг сайланган президенти Доналд Трамп лавозимига киришганидан кейин АҚШ сиёсатида юз бериши мумкин бўлган катта ўзгаришлар ҳақида огоҳлантирди. Бу ҳақда dpa ва Reuters ахборот агентликлари 19 январ куни махфий ҳужжатга таяниб хабар берди.

14 январда Михаэлис имзолаган ва Германия Ташқи ишлар вазирлиги, федерал канцлер идораси, Германия Ички ишлар ва Адлия вазирликларига юборилган ҳужжатда Трампнинг Оқ уйда иккинчи муддатга сайланиш режалари якунида «конституциявий тузумни қайта кўриб чиқишга – Конгресс ва федерал штатлар зарарига президент қўлида ҳокимиятнинг максимал даражада тўпланишига» олиб келадиган «максимал» дастур сифатида тасвирланган. 

«Асосий демократик тамойиллар, назорат ва мувозанат тизими сезиларли даражада бузилади, қонун чиқарувчи ҳокимият, ҳуқуқни муҳофаза қилиш органлари ва оммавий ахборот воситалари ўз мустақиллигини йўқотади ва сиёсий восита сифатида ишлатилади, энг йирик технология компаниялари эса биргаликда бошқарувга эга бўладилар», — деб ёзади дипломат.

Унинг қайд этишича, суд тизими, хусусан, АҚШ Олий суди Трампнинг ўз режаларини амалга ошириш ҳаракатларида марказий ўрин тутади. Михаэлис фикрича, Адлия вазирлиги ва Федерал терговлар бюроси устидан назорат республикачиларнинг оммавий депортациялар, душман деб ҳисобланганлардан қасос олиш ва қонуний иммунитет каби сиёсий ва шахсий мақсадларига эришишнинг калитидир.