Ўзбекистонда миллий автомобиллар ҳақида анимацион фильм ишланмоқда

«Ўзбеккино» Миллий агентлиги бадиий кенгаши томонидан муаллиф Исмоил Шомуродовнинг «Матизнинг саргузаштлари» номли кўп қисмли мультфильм сценарийси маъқулланди. Бу ҳақда агентлик ахборот хизмати хабар тарқатди.

Ушбу анимацион фильмнинг қаҳрамонлари - Ўзбекистонда ишлаб чиқариладиган автомобиллардан ташкил топган бўлиб, унда бош қаҳрамон - кичкинтой «Матиз» билан боғлиқ турли қизиқарли саргузаштлар ҳикоя қилинади. Фильмни яратишда Абдулатиф Ҳайдаров бошчилигидаги аниматорлар гуруҳи ҳамда рассом Зилола Ҳамидова ижод қилмоқда.

Ҳозирда мультфильмнинг дастлабки 6 қисми бўйича ишлар бошлаб юборилди. Йил сўнгига қадар ушбу янги мультфильмни болажонлар эътиборига тақдим этиш режалаштирилган.