«Mashina vremeni» guruhi rahbari Andrey Makarevich «xorijiy agentlar» ro‘yxatiga xorijiy OAVdagi bayonotlari, jumladan, ukrainalik jurnalist Dmitriy Gordonga bergan intervyusi tufayli kiritildi. Bu haqda 25 noyabr, juma kuni musiqachining advokati Aleksandr Peredruk ma’lum qildi.

Makarevich birinchi bo‘lib ro‘yxatga moliyalashtirish uchun emas, balki «xorijiy ta’sir» tufayli kiritildi, dedi advokat Pavel Chikov.

«Xorijiy mablag‘ topilmadi, lekin u xorijlik jurnalistlarga intervyu bergani uchun bu «xorijiy ta’sir» deb hisoblandi – ular go‘yo fikrni tarqatish uchun maydonchani taqdim etgan», — dedi advokat.

Shu bilan birga, u intervyu Gordon «xorijiy agentlar» reyestriga kiritilishidan oldin chiqqaniga e’tibor qaratdi.

«Adliya vazirligi ham Makarevichga qanday ta’sir qilingani haqidagi savollarga javob bera olmadi. Nima uchun bu Ukraina manfaatlariga mos kelishi ham aniqlashtirilmadi», - deya qo‘shimcha qildi advokat.

25 noyabr kuni Moskvaning Zamoskvoretskiy sudi Makarevichning «xorijiy agent» deb tan olinishiga qarshi chiqqan da’vosini rad etdi. Rossiya axborot agentliklari sud vakillariga tayanib ma’lum qilishicha, sud musiqachini «da’volarni qondirish bo‘yicha» rad javobi berdi.

Musiqachi Andrey Makarevich, rassom Mixail Shats va siyosatshunos Valeriy Solovey 11 oktyabr kuni Rossiya Adliya vazirligi ustidan sudga murojaat qildi. Ular reyestrga «xorijiy agentlar» kiritilishini noqonuniy deb topishni talab qilishdi. Uchalasi ham da’vo arizasida ushbu maqom ularning huquqlarini buzayotgani va konstitutsiyaga zid ekanligini ta’kidlagan.

Makarevich 2 sentabrda ro‘yxatga qo‘shildi. Aktyor Mixail Shats, Moskva munitsipalitetining sobiq deputati Yuliya Galyamina, «Novaya gazeta. Yevropa» bosh muharriri Kirill Martinov, jurnalist Sergey Loyko, bloger Kirill Fedorov, tarixchi Sergey Medvedev va «Novosti» MChJ – Krasnoyarsk TVK telekompaniyasining yuridik shaxsi «OAV-xorijiy agentlar» reyestriga kiritilgan.

Rossiya hukumati tomonidan tuzilgan «OAV-xorijiy agentlar» reyestrida Adliya vazirligiga hisobot berish uchun yaratilgan 179 dan ortiq ommaviy axborot vositalari, jismoniy va yuridik shaxslar mavjud. «Jismoniy shaxslar-xorijiy agentlar» reyestriga 19 dan ortiq kishi kiritilgan.