Jamiyat | 20:36 / 05.06.2025
1527
1 daqiqa o‘qiladi

Rossiyada ota-ona qaramog‘isiz qolgan bola O‘zbekistonga qaytarildi

U otasi bilan mehnat migratsiyasida bo‘lgan, biroq hujjatlari noto‘g‘ri rasmiylashtirilgani uchun RFdagi vaqtinchalik saqlov markaziga joylashtirilgan.

Foto: Sun’iy intellekt tomonidan yaratilgan surat

Bugun, 5 iyun kuni Rossiya Ichki ishlar vazirligi xodimlari hamrohligida ota-ona qaramog‘isiz qolgan, voyaga yetmagan O‘zbekiston fuqarosi mamlakatga olib kelindi. Bu haqda Ijtimoiy himoya milliy agentligi xabar berdi.

Qayd etilishicha, ushbu bolaning otasi mehnat migratsiyasida bo‘lib, hujjatlar noto‘g‘ri rasmiylashtirilgani bois, o‘g‘lini vaqtinchalik saqlov markazidan olib keta olmagan.

Voyaga yetmagan fuqaro Toshkentga yetib kelganidan so‘ng, «Inson» ijtimoiy xizmatlar markazi tomonidan onasiga topshirilgan. Endilikda bola uchun ijtimoiy qo‘llab-quvvatlash ishlari uning doimiy yashash joyida davom ettiriladi.

Ma’lumot uchun, O‘zbekiston Ichki ishlar vazirligi, Tashqi ishlar vazirligi hamda Ijtimoiy himoya milliy agentligining hamkorligi natijasida 2025 yil 5 iyun holatiga qadar jami 56 nafar voyaga yetmagan fuqaro vatanga qaytarilgan.

Mavzuga oid