Sud Trampga Ta’lim vazirligining barcha xodimlarini ishga qaytarish majburiyatini yukladi

Massachusets okrug sudi Donald Trampga AQSh Ta’lim vazirligi faoliyatini to‘liq tiklash majburiyatini yukladi, deb xabar beradi CNBC.

«Departament o‘z funksiya va majburiyatlarini, shuningdek, Kongress tomonidan belgilangan boshqa qonunchilik aktlarini bajarish imkoniyatiga ega bo‘lishi kerak», — deyiladi federal sudya Men Chjunning qarorida.

Shunday qilib, prezident ma’muriyati vazirlikning 1,3 mingdan ortiq xodimini lavozimga tiklashi kerak bo‘ladi.

Donald Tramp 20 mart kuni Ta’lim vazirligini qisqartirish jarayonini boshlashga oid farmonni imzolagan edi. Unda ta’lim vaziri Linda Makmahonga «Ta’lim vazirligining yopilishini ta’minlash va ta’lim sohasidagi vakolatlarni shtatlarga qaytarish bo‘yicha barcha zarur choralarni ko‘rish» topshirilgan. Farmon imzolanganidan bir necha kun o‘tib, o‘qituvchilar kasaba uyushmalari va huquq himoyachilari prezident ma’muriyati ustidan sudga shikoyat kiritgan.

Da’voga ko‘ra, ish o‘rinlarining bunday qisqartirilishi ta’lim vazirligini butunlay falajlaydi, oqibatda departament o‘z funksiyalarini bajarolmay qoladi. Bu esa AQSh konstitutsiyasiga zid, Kongress vakolatlari cheklanmoqda.

«Chunki vazir Makmahonga qonuniy funksiyalarni yo‘q qilish yoki buzishga ruxsat berilmagan, u qonun bilan belgilangan ruxsatdan tashqari vazirlikning mas’uliyatini boshqa agentlik yoki tashkilotga o‘tkaza olmaydi», — deyilgan edi arizada.

Tramp vazirlikni yopish qarorini davlat xarajatlarini qisqartirish dasturi doirasida qabul qilgan. U shuningdek, AQSh Xalqaro taraqqiyot agentligi kabi boshqa tashkilotlar ham yopilishini aytgan. Ammo bu uning vazirlik darajasidagi idorani yopish yo‘lidagi birinchi urinishi hisoblanadi.