Eron davlat xodimlarining iPhone’lari Isroil bilan urush oldidan kiberhujumga uchradi – OAV

Apple kompaniyasi Isroil bilan urushdan oldingi oylarda eronliklarga smartfonlari kiberhujumga uchragani haqida ogohlantirish yuborgan. Bu haqda Ostindagi (Texas) Miaan Group inson huquqlari tashkilotining yangi tadqiqotida ma’lum qilindi, uning natijalari haqida Bloomberg xabar berdi.

Tadqiqotchilar 2025 yil birinchi yarmida Apple kompaniyasidan kibertahdid haqida xabarnoma olgan bir qancha eronliklarni aniqladi va ular umumiy nishonlarning faqat kichik qismi bo‘lishi mumkin. Shvetsiyada joylashgan kiberxavfsizlik tadqiqotchisi va DarkCell kompaniyasi asoschisi Hamid Kashfiy ham josuslik dasturiy ta’minoti qurboni bo‘lgan eronliklarning yana bir guruhini aniqladi.

Hujumlar Eron ichida ham, xorijda yashovchi eronliklarga qarshi ham uyushtirilgan va bunday ilg‘or kiberrazvedka vositalaridan foydalanishning birinchi oshkor namunasi deyilmoqda. Hujumlar ortida kim turgani noma’lum. Miaan Group ma’lumotlariga ko‘ra, qurbonlar orasida mamlakat ichidagi ikki eronlik dissident va Yevropada yashovchi Eron fuqaroligiga ega IT-mutaxassisi bo‘lgan - ularning iPhone’lari josuslik dasturiy ta’minotini o‘rnatish obektiga aylangan.

Kashfiy 12 nafar qurbonni topdi - ularning barchasi Eron ichida bo‘lib, mamlakatning texnologiya sohasida yoki hukumat uchun ishlagan. Kashfiy ham, Miaan Group ham jabrlanuvchilarning xavfsizligini himoya qilish uchun ularning ismini aytishdan bosh tortdi. Bloomberg tahririyati ixtiyoridagi bildirishnomalarda hujumlar «favqulodda kamdan-kam uchraydigan» va «millionlab dollar qiymatli» deb ta’riflangan.

Apple eronliklarga yuborgan bildirishnomada josuslik dasturiy ta’minoti hujumlarining yuqori narxi, murakkabligi va global xarakteri dunyodagi eng ilg‘or raqamli tahdidlardan biri ekanini ma’lum qilgan.