Rossiya va Germaniya siyosatchilari Bokuda maxfiy tarzda uchrashgan

Bokuda Rossiya va Germaniya siyosatchilarining maxfiy uchrashuvi bo‘lib o‘tdi, u yerda, ehtimol, «Peterburg muloqoti»ning kelajagi muhokama qilindi — u Ukrainada Rossiya urushi boshlanganidan keyin rasman o‘z faoliyatini to‘xtatgan forum. Bu haqda 8 may, payshanba kuni Germaniyaning ARD jamoat telekanali va Die Zeit gazetasi xabar berdi.

Germaniya Sotsial-demokratik partiyasining tashqi siyosat bo‘yicha eksperti Ralf Shtegner, federal kansler idorasi sobiq rahbari Ronald Pofalla, Shimoliy Reyn-Vestfaliya hukumatida federal va Yevropa ishlari bo‘yicha sobiq vazir, xristian-demokrat Stefan Xoltoff-Pfyortner, shuningdek, "Peterburg muloqoti"ning sobiq ijrochi direktori Martin Xoffman Ozarboyjon poytaxtiga keldi.

Ularning hech biri uchrashuvda ishtirok etganini inkor etmadi va u shaxsiy xususiyatga ega ekanligini hamda hech qanday davlat organi tomonidan buyurtma berilmagani va moliyalashtirilmaganligini ta’kidladi. Germaniya Tashqi ishlar vazirligi ham «uchrashuvlar federal hukumat tomonidan o‘tkazilmagani yoki rejalashtirilmagani»ni bildirdi. Bundan tashqari, OAV xabarlariga ko‘ra, avvalroq YeXHT bosh kotibi lavozimini egallagan shveysariyalik diplomat Tomas Greminger Bokuda bo‘lgan. U ham izoh berishdan bosh tortdi.

Uchrashuvda Rossiya tomonidan Rossiyaning sobiq bosh vaziri, «Gazprom» kuzatuv kengashi raisi Viktor Zubkov ishtirok etdi. Zubkov uzoq vaqt davomida Rossiya tomonidan "Peterburg muloqoti"ni boshqargan. Unga Rossiya prezidenti huzuridagi Inson huquqlari kengashi rahbari Valeriy Fadeyev hamrohlik qildi. Bu kamida uchinchi uchrashuvdir. Shunga o‘xshash tarkibdagi delegatsiyalar 2024 yilda ikki marta Bokuda uchrashgan.