Quvurlardan kelayotgan suv ichishga yaroqli ekani aytildi

Odamlar o‘z uylarida ichimlik suvi uchun kuler ishlata boshlagani jo‘mrakdagi suvning sifati yomonlashganini anglatmaydi, deb hisoblaydi “O‘zsuvta’minot”. Kompaniya rasmiylarining Kun.uz muxbiri savoliga javoban ma’lum qilishicha, ichimlik suvi sifati avval qanday nazorat qilingan bo‘lsa, hozir ham shunday nazorat qilinyapti.

O‘zbekistonda o‘z xonadonida kuler yoki jo‘mrakosti filtrlarini ishlatadigan aholi soni oshib bormoqda. Kun.uz muxbiri “O‘zsuvta’minot” AJ o‘tkazgan matbuot anjumanida quvurlar orqali yetkazib berilayotgan ichimlik suvining sifati haqida so‘radi.

Kompaniya rasmiylarining fikricha, odamlar kuler ishlata boshlagani jo‘mrakdagi suv sifati yomonlashdi degani emas.

“Ichimlik suvi sifati ilgari qanday nazorat qilingan bo‘lsa, hozir ham shunday nazorat qilib turilibdi, sifati yomonlashgani yo‘q. To‘g‘ri, baklajkadagi suvlar – haqiqatan ishlov berilgan, filtratsiya darajasi yuqoriroq, yumshoqligi jihatdan yaxshiroqdir, lekin bu [jo‘mrakdagi] ichimlik suvi sifati yomonligini bildirmaydi”, – dedi “O‘zsuvta’minot” raisi o‘rinbosari Komilbek Yusupov.

“Bizning har bitta inshootimizdan chiqayotgan suvning sifati doimiy nazoratda. 24 soat barcha parametrlar bo‘yicha har soatda nazorat qilib boriladi. Bu parametrlar MDH parametrlari bilan bir xil. Quvurlardan kelayotgan “vodoprovod” suvi sifatiga mas’ul tashkilot sifatida aytamizki, hammasi ichishga, iste’molga yaroqli hisoblanadi”, – dedi kompaniya matbuot xizmati rahbari Akmal Murodov.

“O‘zsuvta’minot” raisining boshqa bir o‘rinbosari Xurshid Rahmatullayevga ko‘ra, suv sifati nazorati shaffof yo‘lga qo‘yilgan: iste’molchilar Waterlab onlayn xaritasidan foydalanib, o‘z hududiga qayerdan suv yetkazib berilayotgani, uning sifati, tarkibi qanaqaligi, qachon oxirgi marta namuna olingani kabi ma’lumotlar bilan tanishib turishi mumkin.

“Hozir respublika bo‘yicha 81 ta laboratoriyamiz ishlab turibdi. Hammasi standart bo‘yicha namunalarni olishadi. Agar suvning sifati yomonlashadigan bo‘lsa, suv berish to‘xtatiladi”, – dedi Rahmatullayev.