Britaniya artilleriya snaryadlari va geksogen ishlab chiqarishni keskin oshiradi

Britaniyaning BAE Systems mudofaa kompaniyasi NATO standartlariga mos keladigan gaubitsalar va o‘ziyurar artilleriya tizimlari uchun 155 millimetrli snaryadlar ishlab chiqarishni 16 baravarga oshiradi. Shu tariqa, Buyuk Britaniya AQSh va Fransiya ta’minotiga qaramlikdan qutulib, Rossiyaning Ukrainadagi urushidan kelib chiqqan talabni qondirish niyatida, deb yozadi The Times. Ushbu vazifani amalga oshirishga ikki yil ajratiladi. Xavfsizlik nuqtai nazaridan aniq raqamlar keltirilmagan.

O‘q-dorilar shu yil yozda ishga tushadigan Uelsdagi yangi BAE fabrikasida ishlab chiqariladi. Kompaniya bir vaqtning o‘zida geksogen (portlovchi modda) ishlab chiqarishni ham oshiradi. U yangi zavod qurish talab etilmaydigan va yiliga 100 tonnagacha portlovchi modda olish imkonini beradigan yangi innovatsion texnologiya asosida ishlab chiqariladi. Bitta avtomatlashtirilgan ishlab chiqarish jarayoni uchun mo‘ljallangan barcha uskunalarni standart yuk konteyneri ichiga joylashtirish mumkin.

BAE rahbariyati a’zosi Stiv Kardyuning ta’kidlashicha, kompaniya Amerika komponentlaridan foydalanmagan holda o‘q-dorilarni mustaqil ishlab chiqarishga o‘tmoqchi. Bu AQSh tomonidan qo‘yiladigan cheklovlarsiz mahsulotlarni boshqa davlatlarga yetkazib berish imkonini taqdim etadi.

Bundan tashqari, kompaniya markazlashmagan geksogen ishlab chiqarish texnologiyasini ham sotmoqchi. Kardyuning tushuntirishicha, Yevropa davlatlari keng miqyosda portlovchi moddalar ishlab chiqarishda qiyinchiliklarga duch kelyapti. Dunyodagi keskinlik, global urush xatarlari ortayotgani, shuningdek, AQShning yangi rahbariyati siyosati inobatga olingan holda, kompaniya o‘z yechimlariga talab oshishini kutmoqda.

BAE — Buyuk Britaniyada 155 millimetrli artilleriya snaryadlarining yagona ishlab chiqaruvchisi. Qirollik armiyasi ulardan Archer gaubitsalari va o‘ziyurar artilleriya qurilmalarida foydalanadi. Shu bilan birga, ushbu o‘q-dorilarning katta zaxirasi Rossiya urush boshlaganidan keyin Ukrainaga berilgan. Kardyuning ta’kidlashicha, ishlab chiqarish ko‘lamini oshirish Buyuk Britaniyaga «Rossiya va boshqa dushman davlatlarga samarali qarshi turish» imkonini beradi.

Ukrainalik harbiy manbalarning ma’lumotlariga ko‘ra, Rossiya armiyasi har kuni 12 mingga yaqin, Ukraina Qurolli kuchlari esa taxminan 7 mingta snaryad uchirmoqda. Rossiya ehtiyojlarining qariyb 45 foizini Shimoliy Koreyadagi oltita zavod ta’minlayapti. Mamlakatning o‘zi esa oyiga 250 mingga yaqin snaryad ishlab chiqaradi.