Meta Tsukerbergning xavfsizligi uchun 2024 yilda 14 mln dollar sarfladi

Meta Platforms kompaniyasi asoschisi va bosh direktori Mark Tsukerbergning jami mukofot pullari 2024 yilda 2,8 million dollarga oshib, 27,2 million dollarga yetdi. Bu haqda AQSh Qimmatli qog‘ozlar va birja komissiyasiga tayanib MarketWatch xabar berdi.

Qayd etilishicha, Tsukerberg kompaniyaning boshqa har qanday top-menejeridan ko‘proq pul ishlab topgan. 2012 yildan beri Tsukerbergning maoshi yiliga 1 dollarni tashkil etadi, shuningdek, u bonus to‘lovlari va aksiyalar olmaydi. Biznesmen hamda uning rafiqasi Prissilla Chan avvalroq o‘z mablag‘larining 99 foizini xayriyaga yo‘naltirishni va’da qilgandi.

Umumiy to‘lovlar Tsukerberg hamda uning oilasi xavfsizligini ta’minlash xarajatlarini o‘z ichiga oladi. O‘tgan yili bunga 14 million dollar sarflangan — 2023 yil Facebook asoschisi va uning oilasi xavfsizligiga 10 million dollar yo‘naltirilgan edi. Bundan tashqari, Meta uning shaxsiy samolyotdagi parvozlari uchun 2,6 million dollar to‘lagan.

Meta 2024 yilda dividend to‘lashni boshlagan, to‘rtinchi chorakdagi o‘sishdan keyin u har bir aksiya uchun 0,52 dollarni tashkil etgan. Tsukerberg kompaniyaning taxminan 13 foiz aksiyasiga egalik qiladi va yiliga soliqlar bilan qo‘shib hisoblaganda 700 million dollarga yaqin dividend oladi.

2025 yil boshidan beri Meta kapitalizatsiyasi 14,3 foizga, ya’ni 1,27 trillion dollargacha qisqardi.