Ekvadorning amaldagi prezidenti saylovlarda g‘alaba qozondi

Ekvadordagi prezidentlik saylovlarida amaldagi davlat rahbari, konservator Daniel Noboa g‘alaba qozondi. Uning so‘l markazchilardan raqibi Luisa Gonsales ovoz berish natijalarini tan olmasligini aytdi.

Daniel Noboa Foto: AP / Dolores Ochoa

Ekvadorning amaldagi prezidenti Daniel Noboa prezidentlik saylovlarining ikkinchi bosqichida g‘alaba qozondi. Konservativ siyosatchi 55,5 foizdan ko‘proq ovoz to‘pladi. Uning so‘l markaziy qanotdagi raqibi Luisa Gonsales 44,5 foizdan kam ovoz to‘pladi. Bu ma’lumotlar respublika Markaziy saylov komissiyasi saytida 14 aprel, dushanba kuni saylov byulletenlarining 96,75 foizi ko‘rib chiqilishi yakunlari bo‘yicha e’lon qilindi.

Markaziy saylov komissiyasi ma’lumotlariga ko‘ra, saylovda saylovchilarning 83 foizdan ortig‘i, ya’ni 11,1 million nafari ishtirok etgan.

Gonsales allaqachon saylov natijalarini tan olmasligini aytib, ularni «eng jirkanch firibgarlik» va diktatura deb atagan. U saylov qutilarini ochish va ovozlarni qayta sanashga chaqirdi. Siyosatchining murojaati X ijtimoiy tarmog‘ida e’lon qilingan.

Noboa 2023 yil oktyabr oyida, 35 yoshida prezident etib saylangan edi. Uning birinchi muddati bor-yo‘g‘i 1,5 yil davom etdi, chunki avvalgi davlat rahbari Gilermo Lasso impichment tufayli iste’foga chiqdi. Noboa bu muddatni yakuniga yetkazib qo‘ydi va endi to‘rt yillik yangi muddatga saylandi.

#saylov #Ekvador