Raqobat qo‘mitasi qurilishni vaqtida tugallamagan qurilish kompaniyasiga nisbatan ish qo‘zg‘atdi

Raqobat qo‘mitasi “Zamin Great City” qurilish kompaniyasiga nisbatan ish qo‘zg‘atdi, deya xabar bermoqda qo‘mita matbuot xizmati.

Ma’lum qilinishicha, Raqobatni rivojlantirish va iste’molchilar huquqlarini himoya qilish qo‘mitasiga fuqaro tomonidan “Zamin Great City” MChJ bilan tuzilgan shartnoma yuzasidan murojaat kelib tushgan.

Unga ko‘ra, Toshkent shahri Bektemir tumanidagi ko‘p qavatli turar joydan 39,47 kv m maydonga ega 2 xonali xonadonni sotib olish uchun 252 608 000 so‘m to‘lov amalga oshirilgan. Shartnoma bo‘yicha qurilish muddati 2024 yil 4 chorak etib belgilangan bo‘lishiga qaramay, hanuzgacha uy topshirilmagani va qurilish ishlari to‘xtab qolgani aniqlangan.

“O‘zbekiston Respublikasi “Iste’molchilar huquqlarini himoya qilish to‘g‘risida”gi qonuni 19-moddasiga muvofiq iste’molchi belgilangan muddatda uy topshirilmagan taqdirda shartnomadan voz kechish, yetkazilgan zararni qoplash va to‘langan mablag‘ni qaytarish huquqiga ega. Shuningdek, ijrochi qurilish muddatini buzgani uchun qonunchilikda nazarda tutilgan penya va boshqa majburiyatlarni bajarishi shart.

Yuqoridagilardan kelib chiqib Raqobat qo‘mitasi Maxsus komissiyasi tomonidan “Zamin Great City” MChJga nisbatan ish qo‘zg‘atildi. Qurilish muddatlariga amal qilish, iste’molchilarning qonuniy huquqlarini himoya qilish va ularning moddiy manfaatlarini tiklash bo‘yicha chora-tadbirlar belgilandi”, - deyiladi rasmiy xabarda.

Qo‘mita ma’lumotlariga ko‘ra, 2024 yilda qurilishda iste’molchilar huquqlari buzilishi masalasi bo‘yicha 1640 ta, 2025 yil o‘tgan davri mobaynida 234 ta murojaat kelib tushgan bo‘lib, ko‘rib chiqish natijasida jami 16,2 mlrd so‘m mablag‘ qayta hisob-kitob qilingan.

Raqobat qo‘mitasi iste’molchilarni qurilish shartnomalarini imzolashda ehtiyotkor bo‘lishga, qurilish kompaniyalarini esa shartnomaviy majburiyatlariga qat’iy rioya qilishga chaqirgan.