Malayziyaning yetakchi aviakompaniyasi O‘zbekistonga muntazam havo qatnovlarini yo‘lga qo‘yadi

Uchrashuv boshida Kamarudin Meranun Air Asia X Berhad aviakompaniyasi joriy yilning may oyidan e’tiboran Kuala-Lumpur – Toshkent – Kuala-Lumpur yo‘nalishi bo‘yicha aviachiptalar sotuvini boshlash va sentabr oyidan haftasiga 4 marotaba muntazam aviaqatnovlarni yo‘lga qo‘yish bo‘yicha rejalarini ma’lum qildi.

Kompaniya raisi o‘zining tarmoq kompaniyalari va O‘zbekiston milliy aviatashuvchisi – Uzbekistan Airways kompaniyasi bilan birgalikda respublika shaharlarini Janubi-Sharqiy Osiyo mamlakatlarini Markaziy Osiyo hamda MDH davlatlari bilan bog‘laydigan yirik aviahablarga aylantirish niyatida ekanini bildirdi.

"O‘zbekistonga Malayziya va Indoneziyadan musulmon sayyohlar oqimini yanada oshirish maqsadida guruh qoshida faoliyat yuritayotgan Ikhlas sayyohlik kompaniyasi mamlakatingiz turoperatorlari bilan yaqin hamkorlik qilishga tayyor. Shuningdek, O‘zbekistonga bo‘lajak aviaparvozlarni yo‘lga qo‘yish bo‘yicha amaliy harakatlarni boshlash hamda sayyohlar uchun yaratilgan infratuzilma bilan yaqindan tanishish maqsadida kompaniya delegatsiyasining O‘zbekistonga safari rejalashtirmoqda", dedi u.

Capital A Berhad guruhi Osiyodagi eng yirik va yetakchi kam budjetli (low-cost) aviakompaniya hisoblanadi. Aviakompaniya parki 200 ta samolyotdan iborat. Aviatsiya holdingi 6 ta (AirAsia Malaysia, AirAsia X, AirAsia Thailand, AirAsia Indonesia, AirAsia Philippines, AirAsia Cambodia) aviakompaniyani birlashtiradi. AirAsia X kompaniyasi uzoq masofali reyslarni amalga oshiradi. Holding Kuala-Lumpur, Bangkok, Jakarta, Manila, Pnompen aeroportlaridan xab sifatida foydalanadi. Hozirgi kunda aviaguruhning marshrut tarmog‘i 160 dan ortiq yo‘nalishdan iborat. Ular Osiyo va Okeaniyadagi yirik aeroportlarni qamrab oladi.