Hafta oxirida havo ilishi kutilmoqda

29–31 mart kunlari O‘zbekiston bo‘yicha iliq va quruq ob-havo bo‘lishi kutilmoqda. «O‘zgidromet» xabariga ko‘ra, faqat 29 martda ayrim tog‘li hududlarda yog‘ingarchilik (yomg‘ir, qor) bo‘ladi.

Shamol sharqdan 7–12 metr/soniya tezlikda esadi, 30–31 mart kunlari respublika shimolida va cho‘l hududlarida ba’zi joylarda 13–18 metr/soniyagacha kuchayishi mumkin.

Havo harorati kechalari +3...+8 daraja atrofida bo‘ladi, kunduz kunlari esa +19...+22 darajagacha, shimol, janub va cho‘l hududlarda +23...+26 darajagacha isiydi.

Toshkentda 29–31 mart kunlari havo biroz bulutli, vaqti-vaqti bilan o‘zgaruvchan bo‘ladi, yog‘ingarchilik kutilmaydi. Shamol sharqdan 3–8 metr/soniya tezlikda esadi. Harorat kechalari +5...+8 daraja bo‘ladi, kunduz kunlari +20...+22 darajagacha ko‘tariladi.

Bugun respublika bo‘yicha havo biroz bulutli bo‘lishi saqlanib turadi, Qoraqalpog‘iston Respublikasi, Xorazm, Navoiy, Toshkent, Sirdaryo viloyatlarida va Farg‘ona vodiysi viloyatlarida ba’zi joylarda biroz yomg‘ir yog‘adi. Respublikaning qolgan hududlarida yog‘ingarchilik kutilmaydi. Kunduzgi harorat +10...+15 darajani tashkil etadi.