“O‘ziga ishongan ayollarga alohida hurmat bilan qarayman” - Saida Mirziyoyeva

“Qiyinchiliklarga qaramay, o‘z ishini boshlayotgan, o‘ziga ishongan va olg‘a intilayotgan ayollarga doimo alohida hurmat bilan qarayman. Ularning qat’iyati va muvaffaqiyat sari ildam harakati oilani ham, jamiyatni ham, mamlakatni ham oldinga siljitadigan kuchdir”, — deydi Mirziyoyeva.

Prezident yordamchisi o‘z biznesini rivojlantirishga intilayotgan xotin-qizlar uchun yaratilgan Hamroh prezident dasturini alohida tilga oldi.

Ushbu dastur doirasida har bir ayol zarur bilimlarni olishi, murabbiylar ko‘magi hamda imtiyozli kreditlar va grantlardan foydalanishi mumkin.

“Ishonchim komilki, har bir muvaffaqiyat tarixi O‘zbekiston taraqqiyotiga qo‘shilgan hissadir. Bunday voqealar kun sayin ko‘payib bormoqda”, — deb ta’kidlagan Mirziyoyeva.

Eslatib o‘tamiz, Hamroh dasturi doirasida 2025 yil 1 maydan quyidagilarni amalga oshirish belgilangan:

·        xotin-qizlarga “yashil loyihalar” va IT sohasidagi loyihalarni amalga oshirishga, shuningdek, kamida 5 nafar xotin-qizning tadbirkorligini yo‘lga qo‘yishga ko‘maklashgan 1 ming nafar “ustoz” tadbirkorlarga 50 million so‘mgacha grant ajratish;

·        ijobiy kredit tarixiga ega bo‘lgan xotin-qizlarga 100 mln so‘mgacha garovsiz kredit ajratish;

·        ayol tadbirkorlar tomonidan kredit hisobidan sotib olinayotgan asbob-uskunalar yetkazib berilgunga qadar “Tadbirkorlikni rivojlantirish kompaniyasi” AJ tomonidan kafillik taqdim etilishini yo‘lga qo‘yish.