Shuhrat Qurbonov Humo boshqaruvi raisi lavozimidan ketdi

Uning o‘rniga Aleksey Maksimov tayinlandi.

Foto: Kun.uz

Shuhrat Ravshanbekovich Qurbonov “Milliy banklararo protsessing markazi” AJ (Humo) boshqaruvi raisi lavozimini tark etdi. Bu haqda Korporativ axborot yagona portali ma’lumotlaridan ma’lum bo‘ldi.

Unga ko‘ra, Shuhrat Qurbonov 2025 yil 6 mart kuni o‘z arizasiga ko‘ra “Milliy banklararo protsessing markazi” AJ rahbarligidan ketgan. 7 mart kuni uning o‘rniga Aleksey Yurevich Maksimov boshqaruv raisi lavozimiga tayinlangan. Bungacha u Octobank AJ boshqaruvi raisi o‘rinbosari lavozimida ishlayotgan edi.

Shuhrat Qurbonov Humo to‘lov tizimiga u tashkil etilgan 2018 yil sentabrdan buyon rahbarlik qilib kelayotgan edi.

Rahbariyatdagi bu o‘zgarish Humo'ning egasi o‘zgarishi ortidan ro‘y berdi. Hukumat yanvar oyida kompaniyadagi 100 foizlik davlat ulushini 65 mln dollarga xususiylashtirish bo‘yicha “Paynet” AJ bilan kelishuvga erishilganini e’lon qilgandi.

#Humo #Shuhrat Qurbonov #Aleksey Maksimov