AQSh Hamas bilan garovga olinganlar yuzasidan to‘g‘ridan to‘g‘ri muzokaralarga kirishdi

Oq uy 5 mart, chorshanba kuni AQSh fuqarolari bo‘lgan isroillik garovga olinganlarni ozod qilish uchun Hamas guruhi bilan bevosita muzokaralar olib borayotganini tasdiqladi. «Amerikaliklar hayoti xavf ostida», dedi Oq uy matbuot kotibi Kerolin Livitt. U muzokaralar tafsilotlarini oshkor qilmadi va ular hali ham davom etayotganini ta’kidladi. Vashington pozitsiyasini AQSh prezidentining garovga olish masalalari bo‘yicha maxsus vakili Adam Beler ifodalayapti.

Avvalroq Axios portali Qatarda Beler va Hamas vakillari o‘rtasida muzokaralar bo‘layotgani haqida xabar bergan edi. Oq uy Falastin guruhi bilan to‘g‘ridan to‘g‘ri muzokara qilishdan oldin Isroil bilan maslahatlashgan, dedi Livitt. Isroil rasmiylari buni tasdiqladi.

Isroillik arabshunos va siyosatshunos Kseniya Svetlovaning fikricha, AQSh va Hamas o‘rtasidagi to‘g‘ridan to‘g‘ri muzokaralar Isroilning pozitsiyasini jiddiy ravishda zaiflashtiradi.

Tramp falastinliklar va Hamasga tahdid qilmoqda

Livittning bayonotidan ko‘p o‘tmay, AQSh prezidenti Donald Tramp Hamas rahbariyatiga nisbatan keskin tahdidlar bilan chiqdi. U barcha garovga olinganlarni zudlik bilan ozod qilishni va o‘ldirilgan isroilliklarning jasadlarini topshirishni talab qildi. «Aks holda siz uchun hammasi tugaydi», deb yozdi u Truth Social platformasida. «Men Isroilga buni amalga oshirishi uchun kerak bo‘lgan hamma narsani yuboryapman. Agar men aytganimni qilmasangiz, Hamasning hech bir a’zosi xavfsiz bo‘lmaydi», — dedi Tramp.

AQSh prezidenti G‘azo aholisiga murojaat qilib: «Sizning kelajagingiz porloq, ammo garovga olinganlarni ushlab tursangiz, o‘lasiz» dedi. U odamlarni «aqlli qaror» qabul qilishga va garovga olinganlarni ozod qilishga chaqirdi.