San’atkorlarga «u yoki bu dinni targ‘ib qilmaslik» bo‘yicha tushuntirish olib borildi

3 mart kuni Madaniyat vazirligida O‘zbekistondagi konsert-tomosha faoliyatida olib borilayotgan madaniy-ma’rifiy ishlar hamda «San’atkor odobi» mavzusida yig‘ilish bo‘lib o‘tdi. Bu haqda vazirlik matbuot xizmati xabar berdi.

Ma’lum qilinishicha, tadbirda huquq-tartibot idoralari xodimlari, madaniyat vazirining birinchi o‘rinbosari Bahodir Ahmedov, diniy qo‘mita matbuot kotibi Ilhom Ma’rufov, «O‘zbekkonsert» rahbariyati va xonandalar qatnashgan.

Yig‘ilishda o‘zbek san’atkorlarining ma’naviy-madaniy faoliyati, «San’atkor odob-axloqi», «O‘zbekiston Respublikasida fuqarolarning vijdon erkinligini ta’minlash va diniy sohadagi davlat siyosati konsepsiyasi» mazmuni, shuningdek san’atkorlarning konsert-tomosha faoliyati uchun litsenziya talab va shartlari hamda mualliflik huquqi kabi masalalar muhokama qilingan. Majlisda shuningdek, «Tadbirkorlar huquqlari va qonuniy manfaatlarini ishonchli himoya qilish chora-tadbirlari to‘g‘risida»gi prezident farmoni va bir qancha nizomlar yuzasidan tushuntirish berilgan.

«Yig‘ilish davomida «Lisenziyalash, ruxsat berish va xabardor qilish tartib-taomillari to‘g‘risida»gi O‘zbekiston Respublikasi Qonuniga asosan «O‘zbekkonsert» davlat muassasasi tomonidan konsert-tomosha faoliyatini amalga oshirishda san’atkorlarning majburiy talablarga rioya qilishi hamda asosiy litsenziya talablarida ijrochilarning «konsert-tomosha sohasida u yoki bu dinni targ‘ib qilmaslik» masalalari ham muhokama qilindi.

Shuningdek, yig‘ilishda O‘zbekiston Respublikasi Konstitutsiyasi qonunlari va boshqa qonunchilik hujjatlariga so‘zsiz rioya etilishi, boshqa davlatlarda bo‘lganida o‘z mamlakat sha’nini e’zozlashi odob-axloq, madaniyat, o‘zbekona qadriyatlarni unutmaslik haqida so‘z bordi», — deyiladi vazirlik xabarida.

Shuningdek, madaniyat vazirining birinchi o‘rinbosari Bahodir Ahmedov — milliy urf-odatlar, qadriyatlar va an’analarga hurmat bilan munosabatda bo‘lish, dabdababozlik, shohona hayotni ko‘z-ko‘z qilmaslik va boshqa salbiy illatlarga yo‘l qo‘ymaslik, jamoat joylarida, atrofdagilar e’tiborini tortuvchi ortiqcha salbiy harakatlarga yo‘l qo‘ymaslik haqida ta’kidlab o‘tgan.

«Shu bilan birga kuy-qo‘shiqlarning mazmuniga e’tibor qaratish, mualliflik huquqlarining buzilish holatlariga ham to‘xtalib o‘tildi. Shuningdek, o‘z ijodlari davomida vatanga muhabbat, sadoqat, vatanparvarlik ruhidagi qo‘shiqlarni ko‘paytirish, o‘sib kelayotgan yosh avlodga namuna bo‘lishlari aytib o‘tildi», deyiladi vazirlik xabarida.