Litva gurjistonlik 74 nafar amaldorni «qora ro‘yxat»ga kiritdi

Litva gurjistonlik 74 nafar amaldorni o‘zining «qora ro‘yxati»ga qo‘shib, ularning mamlakatga kirishini taqiqladi. Bu haqda Litva TIV bayonotiga tayanib, Anadolu xabar berdi.

Qayd etilishicha, amaldorlar inson huquqlarini tizimli ravishda buzib kelganliklari uchun ro‘yxatga kiritilgan. Ular orasida Gurjiston Konstitutsiyaviy sudining yetti nafar sudyasi, shuningdek, boshqa sudyalar, prokurorlar va politsiya xodimlari ham bor.

Ma’lum qilishicha, «jurnalist Mziya Amaglobeliga qarshi yolg‘on ko‘rsatma bergan va uning noqonuniy ravishda qo‘lga olinishida ishtirok etgan» shaxslarga nisbatan ham cheklovlar qo‘llanilgan.

Bayonotda aytilishicha, Boltiqbo‘yi davlatlari qariyb 100 kundan beri «hukmron «Gurjiston orzusi» partiyasining harakatlariga» qarshi namoyish o‘tkazayotgan Gurjiston xalqini qo‘llab-quvvatlaydi.

2024 yil noyabr oyida «Gurjiston orzusi» partiyasi mamlakatning Yevropa Ittifoqiga qo‘shilishi bo‘yicha muzokaralar to‘xtatilishini rasman e’lon qilgandi. Ushbu qadam keng jamoatchilik noroziligiga sabab bo‘lib, butun mamlakat bo‘ylab ommaviy noroziliklarni keltirib chiqardi. 

Avvalroq Gurjistonning Ma’muriy javobgarlik to‘g‘risidagi kodeksida mansabdor shaxslarni haqorat qilish bo‘yicha yangi modda paydo bo‘lgani to‘g‘risida xabar berilgandi. Bundan tashqari, ayrim ma’muriy huquqbuzarliklar uchun jarima va qamoqqa olish muddatlari oshirilgan, Jinoyat kodeksiga ham o‘zgartirishlar kiritilgan.