Ukraina vazirlar mahkamasi mamlakat mudofaa kuchlarida xizmat qilish istagida bo‘lgan 18-24 yoshli ko‘ngillilar uchun bir yillik shartnomani tasdiqladi. Bu haqda mudofaa vaziri Rustem Umerov 11 fevral, seshanba kuni kechqurun Facebookʼda ma’lum qildi. "Biz armiyani kadrlar bilan ta’minlashning zamon talablariga javob beradigan yangi tizimini yaratmoqdamiz", dedi u.
Ta’kidlanishicha, 18 yoshdan 24 yoshgacha bo‘lgan ko‘ngillilar uchun bir yil muddatga tuzilgan shartnomada harbiy qismda boshlang‘ich umumiy harbiy tayyorgarlik, kasbiy tayyorgarlik va moslashish kursidan o‘tish ko‘zda tutilgan.
Ko‘ngillilarga 1 million grivna (23 ming yevro) «bir martalik moddiy yordam» sifatida to‘lanadi, jumladan: shartnoma imzolangandan keyin 200 000 grivna, o‘quv mashg‘ulotlarini tugatgandan keyin 300 000 grivna va harbiy qismlar ro‘yxatidan chiqarilgan kunida 500 000 grivna. Shuningdek, 120 000 grivnagacha bo‘lgan «oylik naqd pullar», xizmatni tugatgandan so‘ng 0 foizda ipoteka olish imkoniyati va bir qator ijtimoiy kafolatlar taqdim etiladi.
Ukrainada Mudofaa vazirligi rahbari Umerovga nisbatan ish ochildi
Ukraina Korrupsiyaga qarshi kurash milliy byurosi (NABU) Mudofaa vaziri Rustem Umerov sodir etgan bo‘lishi mumkin bo‘lgan jinoyat bo‘yicha Ukraina Korrupsiyaga qarshi kurash markazi (TsPK) bayonoti asosida ish yurituvini ro‘yxatga oldi. Bu haqda 27 yanvar kuni TsPK Telegram-kanalida xabar berildi.
Ukraina Mudofaa vazirligi rahbari mansab vakolatini suiiste’mol qilganlikda gumonlanmoqda. Ushbu modda uch yildan olti yilgacha ozodlikdan mahrum qilishni nazarda tutadi.
TsPK ma’lumotlariga ko‘ra, 24 yanvar kuni Umerov Mudofaa xaridlari agentligi (AOZ) Kuzatuv kengashining AOZ direktori Marina Bezrukova bilan shartnomani bir yilga uzaytirish haqidagi qarorini bajarishdan bosh tortgan. Vazir, shuningdek, bu qaror uchun ovoz bergan Kuzatuv kengashining ikki a’zosi – Taras Chmut va Yuriy Jigirni ham ishdan bo‘shatdi, deyiladi Korrupsiyaga qarshi kurash markazi bayonotida.
Shuningdek, mudofaa ta’minot agentliklarida kuzatuv kengashlarining tashkil etilishi NATOning ushbu tuzilmalarni tashqi bosimdan himoya qilish bo‘yicha asosiy tavsiyasi bo‘lganligi ta’kidlandi.
Umerov Bezrukovani harbiy xaridlar va armiya ta’minotidagi muammolarda aybladi.
