Navalniy ishidagi shifokor faxriylar kasalxonasiga rahbar bo‘lishi mumkin

Omsk oblasti Sog‘liqni saqlash vazirligining sobiq rahbari Aleksandr Muraxovskiy Omskdagi yangi urush faxriylari kasalxonasining bosh shifokori bo‘lishi mumkin. Bu haqda 10 fevral, dushanba kuni "Omsk-inform" nashri manba, "Omskiy Forum" Telegram-kanali va mahalliy Om1.ru internet-nashriga tayanib xabar berdi.

Muraxovskiy 2020 yil avgustida Tomskdan Moskvaga uchgan samolyot bortida komaga tushib qolgan muxolifatchi Aleksey Navalniy olib ketilgan Omskdagi 1-sonli tez tibbiy yordam shifoxonasining bosh shifokori bo‘lgan.

Navalniyning davolovchi shifokori Anastasiya Vasileva, xususan, bosh shifokor Muraxovskiyning siyosatchini transportda olib borish imkoni yo‘qligi haqidagi so‘zlarini «yolg‘on» deb atagandi. Muraxovskiy, shuningdek, Navalniyning ahvoli «metabolik buzilish» oqibati ekanligini ta’kidlagan.

Om1.ru portali manbasining aniqlik kiritishicha, Muraxovskiyning nomzodi muhokama qilingan, biroq hozircha ma’qullash jarayonidan o‘tmagan.

Fransiya sudi Navalniylarning Yves Rocher'ga qarshi da’vosini rad etdi

Fransiya kassatsiya sudi (mamlakat oliy sudi) Yuliya va Oleg Navalniyning Yves Rocher kompaniyasini tuhmat va qoralashda ayblagan da’vosini rad etdi. Bu haqda 4 fevral kuni «Novaya gazeta» (NG) o‘z qo‘lidagi sud qaroriga tayanib xabar berdi. Nashrning qayd etishicha, endi Navalniylar qo‘lida so‘nggi variant – Inson huquqlari bo‘yicha Yevropa sudiga shikoyat qilish qoldi. Qonunda IHeSga shikoyat qilish to‘g‘risida qaror qabul qilish uchun to‘rt oy muddat ko‘zda tutilgan.

"Iv Roshe Vostok" (Yves Rocher Rossiya bo‘limi)ning o‘sha paytdagi direktori Bruno Leprning 2012 yil dekabr oyida Rossiya Federatsiyasi Tergov qo‘mitasi raisi Bastrikinga yozgan «jinoyat haqidagi arizasi» muxolifatchi siyosatchi Aleksey Navalniy va uning ukasi Olegni jinoiy javobgarlikka tortish uchun sabab bo‘ldi. Lepru aka-uka tomonidan ro‘yxatga olingan «Glavnoye podpisnoye agenstvo» OAJ firmasini tekshirishni so‘radi, buning natijasida Aleksey va Oleg Navalniy firibgarlikda ayblangan. Ayblovga ko‘ra, ikkalasi ham Yves Rocher'ni kompaniya uchun noqulay bo‘lgan shartnoma tuzishga ko‘ndirgan.

«Ariza aka-uka Navalniylarning jinoiy javobgarlikka tortilishiga sabab bo‘ldi, unga ko‘ra Oleg Navalniy uch yarim yil qamoqda o‘tirdi, keyin esa xuddi shu ayblovlar bilan Aleksey Navalniy 2021 yil 17 yanvarda Rossiyaga qaytishi bilan hibsga olindi», — deyiladi NG xabarida. Aleksey Navalniy o‘limiga qadar koloniyada qoldi. Uning o‘limidan keyin rafiqasi Yuliya da’voning vorisiga aylandi. 2017 yilda IHeS hukmni asossiz va siyosiy motivli deb topdi.