Helsinkidagi hukumat «tajovuzkor urush» olib borayotgan yoki milliy xavfsizlikka tahdid solayotgan mamlakatlar fuqaroligiga ega bo‘lgan xorijliklarning Finlandiyada ko‘chmas mulk sotib olishini taqiqlashga qaratilgan qonun loyihasini ko‘rib chiqish uchun taqdim etdi. «Tashabbusdan maqsad Rossiya fuqarolarining mamlakatda ko‘chmas mulk sotib olish imkoniyatini cheklashdir», — dedi Finlandiya mudofaa vaziri Antti Hakkanen. Uning so‘zlariga ko‘ra, Rossiya Yevropa xavfsizligiga tahdid solishida davom etmoqda va fuqarolari tomonidan qo‘lga kiritilgan ko‘chmas mulkdan «dushmanlik ta’sirini o‘tkazish» uchun foydalanish mumkin.

Yle ta’kidlaganidek, Finlandiyada rossiyaliklar ishtirokidagi ko‘chmas mulk bilan bog‘liq operatsiyalar uzoq vaqtdan beri bahsli bo‘lib kelgan. O‘tgan yili mamlakat Mudofaa vazirligi xaridorlarning Rossiya bilan aloqalarini bahona qilib, bunday bitimlarning bir nechtasini bloklagan edi. Hozirda milliy xavfsizlik nuqtayi nazaridan rossiyaliklarga sotilgan ko‘chmas mulkni musodara qilish imkoniyati ko‘rib chiqilmoqda.

Daniya «soyadagi flot» tankerlarini tekshiradi

Daniya atrof-muhit, yuk tashish va dengizchilar uchun xavf tug‘dirishi mumkin deb hisoblagan tankerlarga xavfsizlik choralarini kuchaytiradi. Bu haqda qirollik dengiz boshqarmasi saytida 5 fevral kuni chop etilgan bayonotda aytilgan. Departament bu qarorni «Daniya bo‘g‘ozlari orqali neft tashuvchi eski kemalar faoliyati»ga javoban qabul qilganini ta’kidladi.

«Portning davlat nazorati tankerlarga qaratilgan, chunki tankerlarning shikastlanishi yoki halokati bilan bog‘liq avariya xavfsizlik, sog‘liq va atrof-muhit uchun ayniqsa jiddiy oqibatlarga olib kelishi mumkin», — deyiladi bayonotda.