Milliy tibbiyot markazida jigar transplantatsiyasi: singil akasiga hayot tuhfa qildi

Milliy tibbiyot markazining professor Azam Babadjanov boshchiligidagi tajribali transplantologlar jamoasi murakkab jarrohlik amaliyotini muvaffaqiyatli o‘tkazdi.

40 yoshli singil uch yildan beri jigar sirrozi bilan og‘rigan akasining hayotini saqlab qolish maqsadida unga o‘z jigarining bir bo‘lagini bergan.

«Murakkab operatsiya yuqori aniqlik va professionallik bilan amalga oshirildi. Hozirda donor va bemorning ahvoli qoniqarli, shifokorlar ularning sog‘lig‘ini doimiy nazorat qilib bormoqda.

Milliy tibbiyot markazi transplantologlari ushbu yo‘nalishda o‘z tajribalarini muntazam takomillashtirib, og‘ir kasalliklarga chalingan bemorlarning hayotini saqlab qolish yo‘lida fidokorona mehnat qilmoqda», deyiladi Milliy tibbiyot markazi matbuot xizmati xabarida.