AQSh Davlat kotibi Marko Rubio Janubiy Afrikada bo‘lib o‘tadigan G20 yig‘ilishida ishtirok etishdan bosh tortdi, deb xabar berdi Reuters.

G20 tashqi ishlar vazirlarining uchrashuvi 20-21 fevral kunlari Yohannesburg shahrida bo‘lib o‘tishi rejalashtirilgan.

Rubioning qarori Trampning yakshanba kungi izohlaridan keyin qabul qilingani ta’kidlanmoqda. AQSh prezidenti dalil keltirmasdan, Janubiy Afrikani «yerlarni musodara qilish» va «ayrim toifadagi odamlarga yomon munosabatda bo‘lish»da ayblagan edi. O‘z navbatida Rubio Janubiy Afrikani «xususiy mulkni ekspropriatsiya qilish» va G20 guruhidan «birdamlik, tenglik va barqaror rivojlanish»ni targ‘ib qilishda foydalanganlikda aybladi.

O‘tgan oy JAR prezidenti Siril Ramafosa davlatga «jamoat manfaatlari uchun» yerni ekspropriatsiya qilishga ruxsat beruvchi qonunni imzoladi. JAR Tashqi ishlar vazirligi ham Rubioning bayonotiga javob berib, ularning qonunchiligi AQSh ekspropriatsiya qonunlariga o‘xshashligini ta’kidladi.

Janubiy Afrikada yerga egalik qilish masalasi mustamlakachilik davri va aparteid merosi tufayli, qora tanlilar yer va mulk huquqlaridan mahrum bo‘lganligi sababli siyosiy jihatdan nozik bo‘lib qolmoqda. 2017 yilda o‘tkazilgan so‘nggi yer auditiga ko‘ra, oqtanli yer egalari hamon mamlakat qishloq xo‘jaligi yerlarining to‘rtdan uch qismiga, aholining 80 foizini tashkil etuvchi qoratanlilar esa bor-yo‘g‘i 4 foizga egalik qiladi.

G20 — eng rivojlangan va rivojlanayotgan iqtisodiyotga ega mamlakatlar hukumatlari klubi. 2024 yil 1 dekabr kuni Janubiy Afrika bu guruhga 12 oylik raislikni qabul qilgan edi.